Бешариқ азалдан Фарғона вилоятининг йирик тўқимачилик марказларидан бири бўлган эди. Лекин бир муддат у соҳа иқтисодий қийинчиликларни бошдан кечирди. Сўнгги йилларда эса мамлакатимизда хорижий инвесторларга яратилган имконият ва маҳаллий ҳокимият саъй-ҳаракати билан янги-янги корхоналар таъсис этилди.

Улардан бири Россия фуқароси Анвар Масъуд биринчи босқичда 200 минг доллар инвестиция киритиб “Miolar textile” хорижий корхонасини очди. У 2023 йилнинг декабрь ойида фаолиятини бошлади. Айни кунларда ойига 110 минг донадан трикотаж футболка, кўйлак, ички кийим, болалар уст-боши тикилмоқда.  

–135 та ишчимиз бор. Бешариқ туманининг ён атроф қишлоқларидан келиб ишлашади, – дейди уста Азима Бароталиева. –Улар асосан ёшлар. Ишларига қараб 2,5-3 миллион сўм иш ҳақи олишади.  

Бу ерда Ўзбекистон пахтасидан йигирилиб сўнг тўқилган трикотаж матолар қўлланилади. Унинг чиройли, бежирим чекланган, ҳар қандай харидорга ёқадиган маҳсулоти аллақачон хорижда ном чиқаришга улгирди. Ҳозирга келиб ҳатто Россияда улгиржи омборхона ҳам очдилар.  

–Дастлаб биз хотин-қизларни тикувчиликка ўргатдик. Ҳозир тўртта йўналишда иш ташкил этилган. Маҳсулотга талаб ошгани туфайли  яна иккита тикув йўналиши очиб иш ўринларини 250 тага етказамиз, – дейди корхона ижрочи директори Элвина Усеинова.  

“Miolar textile” шу йилнинг ўтган даврида 1,5 миллион долларлик маҳсулот экспорт қилди.  

<iframe width="640" height="420" src="https://www.youtube.com/embed/VZWdR-XVDKc" title="BESHARIQDA XORIJIY KORXONA" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" allowfullscreen></iframe>

Бизга маҳаллий ҳокимият яқиндан ёрдам бермаганида эди, бундай натижаларга эриша олмасдик, дейди муассис Анвар Масъуд.

Муҳаммаджон Обидов, Элёр Олимов (видео), ЎзА