Андижон шаҳридаги Ёшлар марказида Андижон вилояти ҳокими Шуҳратбек Абдураҳмонов раҳбарлигидаги вилоят делегациясининг Хитой давлатига сафари якунлари, сафар доирасида эришилган келишувлар юзасидан матбуот анжумани бўлиб ўтди.

Вилоятдаги босма ва электрон оммавий ахборот воситалари, ахборот хизматлари вакиллари, блогерлар ҳамда хитойлик бир гуруҳ инвесторлар иштирок этган анжуманда вилоят делегациясининг Хитой сафари, ҳамкорлик доирасида эришилган шартнома ва келишувлар бўйича кенг маълумотлар берилди. 

– Вилоят делегациясининг 3-11 январь кунларидаги Хитой сафари жуда ҳам самарали ўтди, – дейди вилоят ҳокимининг инвестициялар, инновациялар, хусусийлаштирилган корхоналарга кўмаклашиш, эркин иқтисодий ва кичик саноат зоналари ҳамда туризмни ривожлантириш масалалари бўйича ўринбосари Ботиржон Ҳамраев. – Делегациямиз кунчиқар мамлакатнинг Пекин, Тяньзин, Ухи, Гуанжоу, Анхой, Гуандон, Жилин сингари саноати ўта ривожланган йирик шаҳар ва провинцияларида бўлиб, қатор манфаатли шартномалар имзолади. 

Сафар давомида умумий қиймати 20 миллион доллардан 100 миллион долларгача бўлган кичик ва ўрта лойиҳаларни амалга ошириш, хусусан, Хитой компаниялари томонидан дунёга машҳур брендлар асосидаги маҳсулотларни юртимизда ишлаб чиқаришни йўлга қўйиш, янги иш ўринларини яратишга қаратилган лойиҳаларга алоҳида эътибор қаратилди. 

Маълум қилинишича, сафар давомида таълим, энергетика, қурилиш материаллари ишлаб чиқариш, фармацевтика, автомобилсозлик ва қишлоқ хўжалиги йўналишларидаги компаниялар билан умумий қиймати 5,1 миллиард долларга тенг 56 та келишувга эришилган. 

Шундан 4,4 миллиард доллар қийматдаги 44 та келишувда инвестиция киритиш, 745 миллион долларга тенг 12 та келишувда экспорт маҳсулотлари ишлаб чиқариш кўзда тутилган. 

Жорий йил давомида умумий қиймати 2,9 миллиард долларга тенг 52 та келишув ва шартнома доирасидаги лойиҳалар амалга оширилиши белгиланган. 

[gallery-15497]

Ҳамкорлик келишувлари доирасидаги лойиҳаларни амалга ошириш мақсадида вилоятда хитойлик тадбиркор ва инвесторлар учун умумий майдони 200 гектар бўлган, барча инфратузилмаларга эга саноат зонаси барпо этилади. 

Эркин иқтисодий зона мақоми бериладиган мазкур саноат зонасидаги бино ва иншоотлар хитойлик инвесторларга ижарага берилади. Ҳудудда фаолият олиб борадиган тадбиркорларга солиқ ва божхона имтиёзлари тақдим этилиши кўзда тутилган. 

Келишувлар доирасида Хитой компаниялари томонидан Андижонда электро-автобус, автомобиллар учун оғир тиркамалар, пластмасса иситиш батареялари, йилига 18 миллион квадрат-метр керамогранит, 750 минг тонна оҳак, 100 миллион дона полипропилен қоп ишлаб чиқариш, шунингдек, қуёш панелли электр ва гидро электрстанциялар қуриш сингари лойиҳалар амалга оширилади. 

Бундан ташқари, ҳамкорлик келишувлари доирасида 300 та юк автомашинасига хизмат кўрсатувчи логистика маркази, Хитойнинг “Liaoning Normal University” университетининг Андижон филиали ташкил этилади. 

Анжуманда вилоят ҳокимининг ўринбосари Б. Ҳамраев Хитой компаниялари билан ҳамкорликда амалга ошириладиган лойиҳалар бўйича журналист ва блогерларни қизиқтирган барча саволларга батафсил жавоб қайтарди. 

Ф. Убайдуллаев, З. Умрзоқов (сурат), ЎзА мухбирлари