Бугун фикрга қарши фикр, ғояга қарши ғоя, жахолатга қарши маърифат билан курашиш ҳар қачонгидан кўра муҳим аҳамият касб этмоқда. Сериалларнинг ёшлар онги ва руҳиятига, маънавий дунёсига жиддий рахна солиши кўплаб илмий мисоллар билан исботланган.

2023 йилда энг юқори рейтингга эга бўлган “Слово пацана. Кровь на асфальте” ("Йигит сўзи. Асфальтдаги қон") сериали Россияда ва бошқа мамлакатлар қатори Ўзбекистонда ҳам бирдек кенг муҳокамаларга сабаб бўлмоқда. Кўпроқ ўтиш ёшидаги ва ўсмирлар ҳаёти акс этган сериални катталар ҳам, балоғат ёшига етган ва етмаганлар ҳам томоша қилмоқда. Ҳаттоки, сартарошхоналарда сериалнинг бош қаҳрамонлари каби узун соч ва соқолини қирдириб олдираётган ёшлар кўпайиб, дўконларда сериал қаҳрамонларидаги каби бош кийимлар сотилаётгани ҳақида ҳам эшитгандирсиз.

Мазкур сериалнинг мафкуравий оқибатлари, ўзбек киномайдонида ёшларбоп ўз миллий сериалимизни зудлик билан яратиш талаби ҳар қачонгидан ҳам ортгани ҳақида "Миллий тикланиш" демократик партияси Марказий кенгаши раисининг биринчи ўринбосари Миродил Абдураҳмонов билан суҳбатлашдик.    

<iframe width="650" height="420" src="https://www.youtube.com/embed/Q2c7g6BdfuI" title="“Slovo patsana” seriali nimaga ishora qilmoqda…" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" allowfullscreen></iframe>

Ўзбекистонда 2024 йилги давлат бюджетидан Маданият вазирлигига 1 трлн 100 млрд 445 млн 300 минг сўм ажратилиши режалаштирилмоқда. Вазирлик харажатлари орасида давлат буюртмасига асосан миллий кино маҳсулотларини яратиш, Тошкент халқаро кинофестивалини ўтказиш каби бандлар мавжуд.  

Бу ҳақда Иқтисодиёт ва молия вазирлиги эълон қилган "2024 йил учун Ўзбекистон Республикасининг Давлат бюджети тўғрисида"ги қонун лойиҳасининг республика бюджетидан биринчи даражали бюджет маблағларини тақсимловчиларига ажратиладиган маблағларнинг чекланган миқдорлари бўйича иловада маълумот берилган.  

Шунда ажратилган маблағлардан:

Давлат буюртмасига асосан миллий кино маҳсулотларини яратиш учун харажатлар учун — 105 млрд сўм;  

миллий сериаллар ишлаб чиқаришни қўллаб-қувватлаш ва ривожлантириш учун республика миқёсида фаолият юритувчи телеканалларга ажратиладиган субсидиялар — 12 млрд сўм;  

"Ипак йўли дурдонаси" Тошкент халқаро кинофестивалини ўтказиш учун харажатлар учун — 10 млрд сўм;  

хорижий кинокомпаниялар томонидан Ўзбекистон ҳудудида кино ишлаб чиқариш харажатларининг бир қисмини қоплаш учун харажатлар — 5 млрд сўмни ташкил этмоқда.

Телевизорда ҳар куни намойиш этилаётган сериаллар шафқатсизларча тузоққа туширишга ўхшайди. Сериалларнинг муштарак хусусияти битта; ҳар галги сериядан кейин Кейинги серияда нима бўларкан? деган савол мияда айланаверади. Кунлар ўтаверади. Одамлар сериал қаҳрамонларининг ҳаётига ўралашиб, умрини исроф қилаверади. Ўзимиз ва оиламизни медия асоратидан қутқармай тарбия борасидаги муаммоларига ечим топа олмаймиз.

Бугунги кўтарилган мавзу ечими йўқ муаммо эмас, шунчаки, мавзуга даҳлдор масъуллар учун огоҳликка чақириқ холос. Ўзбек киномайдонида ёшларбоп ўз миллий сериалимизни зудлик билан яратиш, ғояга қарши ғоя, мафкурага қарши мафкура билан курашиш вақти келган. Биз жамоат вакилларининг вазифаси мавжуд муаммоларни ёритиш, эслатиш, масъулларни огоҳликка чақиришдан иборат. Суҳбатдошимиз айтганидек, ҳар бир масалага жамоат вакиллари бирлашиб, назорат қилгандагина "натижа"га эришиш мумкин. Бизни кузатишда давом этинг. Ўзингиз ва яқинларингизни эътиборсиз қолдирманг.

М.Турдалиева, А.Аҳмедов (видео), ЎзА