Муносабат
Мамлакатимизда 2024 йил мамнуният ва шукроналик ила кутиб олинди. Ўтган йил эса Ўзбекистоннинг янги тарихида алоҳида салмоқли давр, кўзга кўринарли ютуқлар қайт этилгани ҳамда ҳар бир соҳа сарҳисобида самарали натижадорликка эришилгани билан эътиборга моликдир.
Президентимиз Шавкат Мирзиёев Янги йил муносабати билан халқимизга йўллаган табригида “2023 йил эл-юртимиз учун қут-баракали ва омадли келди. Энг муҳими, юртимизда тинчлик-осойишталик, турли миллат вакиллари ўртасида дўстлик ва ҳамжиҳатлик ҳукм сурмоқда”, - дея таъкидлади.
Юртимиз равнақига сабаб бўлаётган бугунги фаровонлик, тўкис ҳаёт замирида халқни бир мақсад йўлида бирлаштира олаётган етакчининг узоқни кўзлаб олиб бораётган оқилона сиёсати, аниқ мақсадлар сари йўналтирилган стратегиянинг ўрни беқиёс. Бунга асосан, инсон манфаатлари устувор ҳисобланган жамиятнинг ҳар бир аъзоси қалбида ватанпарварлик, юртга садоқат, эртанги кунга бўлган ишонч туйғулари тобора камол топиб бормоқда.
Айтиш жоиз, халқни миннатдор қила олиш, иқтисодий барқарорликни таъминлаш, маънавий-ахлоқий жиҳатдан баркамолликка эришишда эса асосий эътиборни ёшларга қаратиш юксак салоҳиятли бошқарувнинг бир белгисидир. Биз ҳам ушбу тажрибадан бир андоза олган ҳолда ўз фаолият йўналишимизда, талабаларимизни етук кадрга айлантириш истаги ила Президентимиз илгари сураётган эзгу ғоялар сари дадил қадам ташламоқдамиз.
2024 йилнинг “Ёшлар ва бизнесни қўллаб-қувватлаш йили”, дея эълон қилиниши Ўзбекистонда яхши яшаш суратлари янада ошишидан нишонадир. Ҳар бир инсон, хусусан, ёшлар учун янгича шароит, шахсий ҳамда умуммиллий ривожланишда имконият эшиклари янада кенг очилишини англатмоқда.
“Янги иш ўринлари ташкил этиш, аҳоли даромадларини ошириш эътиборимиз марказида бўлади. Иш ҳақи, пенсия, стипендия ва нафақалар миқдори кўпайтирилади. Хотин-қизлар ва нуронийларни, ёрдамга муҳтож инсонларни қўллаб-қувватлашга алоҳида аҳамият берамиз. Ижтимоий соҳалар ривожини мутлақо янги босқичга кўтарамиз”, - дея таъкидланиши бутун халқимизга бошланаётган йил олдидан азм-у шижоат бахш этиши муқаррар.
Зеро, меҳнатлар муносиб рағбатлантирилар, ёшлар ҳамда бизнес соҳа вакиллари қўллаб-қувватланар экан, мамлакатимиз дунё саҳнида янада юксак бўй кўрсатиб бораверади.
Ривожиддин КАРИМОВ,
Исҳоқхон Ибрат номидаги
Наманган давлат чет тиллари институти ректори
Ҳотам МАМАДАЛИЕВ (сурат), ЎзА