Ўзбекистондан Буюк Британияга мева-сабзавот маҳсулотларини экспорт қилиш лойиҳасини амалга ошириш жараёнида Марказий Осиё минтақаси тарихида илк маротаба ўсимлик зараркунандаларидан ҳоли эркин зоналар яратилди.
Бу борада тажриба дастурининг муҳим босқичларини амалга ошириш ишлари бошланди. Дастлаб Буюк Британия бозорида талаб юқори бўлган қишлоқ хўжалиги маҳсулотлари турлари, ҳосилдорликка таъсир этиши мумкин бўлган зарарли организмлар аниқланди, қиролликка маҳсулот етиштирадиган ҳудудлар ва етиштириб берувчилар танлаб олинди. Лойиҳанинг амалга оширилиши маҳаллий деҳқон ва фермер хўжаликлари учун ҳам яхши тажриба бўлиб, эркин зоналарда етиштирилган маҳсулотларнинг Буюк Британияга “яшил йўлак” орқали ортиқча оворагарчиликларсиз етказилиши, экспорт ҳажмини оширишга имкон беради.
Ўсимликларнинг зарарли организмларидан ҳоли эркин зоналар Тошкент вилоятининг Бўка туманида 3 гектар, Сирдарё вилоятининг Сирдарё туманида 27 гектар майдонда ташкил этилди.
Мазкур ҳудудларда тажриба тариқасида дастлаб помидор ва булғор қалампири етиштирилади. Фитосанитар назоратнинг сифатли олиб борилишини таъминлаш мақсадида Ўсимликлар карантини ва ҳимояси агентлигининг давлат инспекторлари иштирокида ўқув курслари ўтказилди ҳамда зарарли организмларни ўз вақтида аниқлаш бўйича сифатли феромониторинг олиб бориш тартиби таҳлил этилди.
<iframe width="560" height="315" src="https://www.youtube.com/embed/NypI47gK5l8?si=hLdeQRHp_lt52XeQ" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" allowfullscreen></iframe>Санжар Тошпўлатов,
Анвар Аҳмедов,
ЎзА