Тошкент шаҳар жамоат транспорти йўналишларида қатновларни амалга ошириш учун белгиланган нархлар ўзгарди. Бу ҳақда бугун, 2 ноябрь куни Президент ҳузуридаги Ахборот ва оммавий комуникациялар агентлигида ўтказилган матбуот анжуманида маълумот берилди.

Қайд этилишича, жорий йилнинг 1-ноябрь кунидан автобус ва метрополитендаги қатновларни нақд пул орқали амалга ошириш нархи – 2 000 сўмни, қатнов учун 1 марталик электрон тўлов – банк карталари ҳамда AТТО транспорт картаси орқали амалга оширилганда 1 700 сўмни ташкил этмоқда.  

Бундан ташқари, янги табақалашган тариф режаларига кўра Транспорт карталаридан (AТТО) фойдаланган ҳолда бир соат ичида бир йўналишли йўловчи транспортидан бошқасига ўтиш сонидан келиб чиққан ҳолда имтиёзли ва бепул тўлов тарифлари жорий этилган.  

Унга кўра, бир соат ичида биринчи автобусдаги қатнов учун тўлов 1 700 сўмни;  

иккинчи автобусдаги қатнов учун 700 сўмни ташкил этмоқда;  

учинчи ва кейинги автобусларда қатнов эса бепул амалга оширилади.  

Шунингдек, бир соат ичида метродаги тўлов 1700 сўмни, метродан сўнг биринчи автобусдаги қатнов учун тўлов 1 100 сўмни, иккинчи автобусда тўлов 700 сўм, учинчи ва кейинги автобуслардаги қатнов учун эса тўлов бепул бўлади.  

Бундан ташқари, бир соат ичида биринчи автобусда тўлов 1 700 сўм бўлса, ундан сўнг метродаги қатнов учун тўлов 1 100 сўмни ташкил этади, метродан кейинги иккинчи автобусда тўлов эса 700 сўм, ундан сўнгги учинчи ва кейинги автобуслардаги қатнов учун эса тўлов бепул бўлади.  

Шу билан биргаликда, йўловчи биринчи транспортга чиқишида тўлов қилинган вақтдан бошлаб ҳисоб даври бошланади. Яъни, бир соатлик тарифда метродан ҳар доимгидек фақат бир марта фойдаланишга рухсат этилади. Иккинчи маротаба фойдаланганда 60 дақиқалик ҳисоб даври янгидан бошланади.  

Яна қўшимча равишда йўналишли йўловчи транспортидан фойдаланишда, унинг туридан қатъий назар, кунлик, бир, уч ва олти ойлик, йиллик чекланган ва чекланмаган тариф режалари жорий этилган.  

Бунда эса ушбу тарифлардан фойдаланувчи йўловчилар белгиланган вақт даврида чексиз қатновларни амалга оширишлари мумкин.  

<iframe width="560" height="315" src="https://www.youtube.com/embed/N8Vs8-PtqdY?si=1b0Jxy8k6R4rFhL9" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" allowfullscreen></iframe>

М.Эшмирзаева, Н.Абдувоитов, А. Аҳмедов, ЎзА