Муҳим мавзу.

Ижтимоий тармоқлар эҳтиётсизлик оқибатида сувга чўкиб кетиш ҳоллари ҳақида хабарлар бермоқда. Масалан, 30 июль куни Каттақўрғон сув омборида қайиқ ағдарилиб кетиши оқибатида 7 нафар йигитдан 4 нафари чўкиб кетганлиги айтилди. Воқеага йигитларнинг фотосуратга тушиш мақсадида тартибсиз ҳаракатлари сабаб қилиб кўрсатилган. Булар Чироқчи ва Кўкдала туманларида яшовчи 7 нафар йигитлар бўлиб Самарқанд вилояти Нуробод туманида яшовчи танишининг туғилган кунини нишонлаш мақсадида боришган. Шу куни тахминан 17:30 атрофида маҳалладан ўтувчи Каттақўрғон сув омборига чўмилиш мақсадида бориб, қайиқда қирғоқдан тахминан 40 метр узоқликка сузиб боришган. Қайиқ устида фотосуратга тушишни ният қилган йигитлар мувозанатни йўқотишлари оқибитида қайиқ ағдарилиб кетган. Уларнинг  4 нафари воқеа жойида чўкиб кетган ва 3 нафари қирғоққа сузиб чиқа олган. Қидирув-қутқарув ишлари натижасида 4 нафар йигитнинг мурдаси топилган.

Худди шундай аянчли ҳолат Андижон вилояти Балиқчи туманида рўй берган. 24 июль куни Қорадарёда 2009 ва 2011 йилларда туғилган икки нафар бола дарёга  чўмилгани бориб чўкиб кетишган ва 27-28 июль кунлари Норин тумани фавқулодда вазиятлар бўлими ғаввослари томонидан топилган. Бу ҳақда Балиқчи тумани ҳокимлиги Ахборот хизмати хабар берди.

Шунингдек, 6 июнь куни Наманган вилояти Уйчи туманида йигит дарёга чўкиб кетганлиги маълум бўлди. Тошкент вилоятининг Янгийўл шаҳрида эса 16 ёшли мактаб ўқувчиси Жўн каналига чўкиб кетган. Сувга тушган пайтда каналдаги сув оқими кучлилиги туфайли йигит ўзини ўнглай олмаган ва оқиб кетган. Унинг жасади ғаввослар томонидан орадан бир кун ўтганидан кейин топилган.

Жорий йилнинг 25 май куни ҳам Фарғона вилояти Қўштепа туманида мактаб битирувчиси Катта Фарғона каналига чўкиб кетганлиги ҳақида хабар берилганди. Унинг жасади орадан 9 кун ўтиб  топилган.

Бундай аянчли воқеалар ҳақида ўқиш ниҳоятда оғир, лекин афсуски кўплаб огоҳлантиришларга қарамасдан бундай воқеаларнинг такрор ва такрор юз бериши албатта ачинарли.

Эслатиб ўтамиз, айниқса ёшларни чўмилиш рухсат этилмаган, тақиқланган, оқим тезлиги юқори бўлган, чуқур, ўзига нотаниш бўлган сув ҳавзаларида чўмилмасликни тавсия этамиз.

<iframe width="1519" height="578" src="https://www.youtube.com/embed/42HotHqi60E" title="  Муҳим мавзу: Хатарли чўмилишдан сақланинг!" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" allowfullscreen></iframe>

Кенжа Бегжанов,

Сардорбек Поёнов,

Искандар Исматов, ЎзА