Бундан бир ҳафта муқаддам Италиянинг Порденоне шаҳрида велоспортнинг трек йўналишидаги халқаро мусобақада олтин ва бронза медалларини қўлга киритган велоспортчиларимиз Венеция вилоятида шоссе йўналишидаги турнирда ҳам муваффақиятга эришди.

Ҳамюртимиз Нафосат Қўзиева шоссе йўналишида 94,77 километр масофага мўлжалланган пойгада марра чизиғини иккинчи бўлиб кесиб ўтди. Ушбу масофада 1 ва 3-ўринлар италиялик Сильвия Занарди ва Элиза Деваллиерга насиб этди.  

Мазкур пойгаларда Европа давлатларининг энг кучли велоспортчилари иштирок этганини, улар орасида Олимпия ўйинлари, жаҳон чемпионатларининг совриндорлари бўлганини назарда тутсак, Нафосатнинг кумуш медалга эга чиқиши эътиборли натижалардан бири бўлганини англаш мумкин.  

Эслатиб ўтамиз, терма жамоамиз аъзоси Нафосат Қўзиева Порденоне шаҳрида трек йўналишидаги пойгакларда олтин медалга мушарраф бўлган эди.  

Т.Рўзиев, ЎзА