АҚШ Президенти Миллий хавфсизлик бўйича маслаҳатчиси Жейк Салливан Америка ҳукумати Хитой ташқи ишлар вазири Цинь Ганнинг жамоатчилик кўз ўнгидан ғойиб бўлиши сабабини билмайди, дея баёнот берди.

Цинь Ган бир неча ҳафтадан буён жамоатчиликка кўриниш бермаяпти, бу ҳолат оммавий ахборот воситаларида миш-мишлар урчишига олиб келди.

“Шуниси аниқ-ки, биз билмаймиз”, - деган у вазир тақдири ҳақида сўралганда.

Салливан таъкидлашича, давлат котиби Энтони Блинкен яқинда Индонезияда бўлиб ўтган АСЕАН вазирлар форумида Цинь Ган билан учрашиши керак эди, бироқ анжуманда ХХРдан Коммунистик партия комиссияси ташқи ишлар девони раҳбари Ван И иштирок этди.

“Блумберг” агентлиги тарқатган хабарда хитойлик сиёсатчи ғойиб бўлиши ортидан Британия ташқи ишлар вазири Жеймс Клеверлининг Пекинга сафари бекор қилингани ёзилган.

Айни дам Пекин ва Лондон ташрифнинг янги санасини кўриб чиқмоқда. Буюк Британия бу ҳақда ахборот бермаяпти.

Аввалроқ “Politico” нашри Британия ташқи сиёсат идораси раҳбари сўнгги беш йилда илк бор Хитойга бориши мумкин, деб ёзганди. Ўшанда ташриф июль ойига режалаштирилгани маълум қилинган. Кейинроқ маълумотни Клеверли шахсан тасдиқлаганди.

Июль ойи бошида Хитой ҳукумати ташаббуси билан ЕИ дипломатияси раҳбари Жозеп Боррелнинг мамлакатга ташрифи бекор қилингани маълум бўлди. Боррель Пекинга 10 июлда келиши керак эди. “Блумберг” ёзишича, ЕИ ташқи ишлар идораси раҳбари Пекинда Цинь Ган билан музокара олиб боришни мўлжаллаган.