1912 йил ҳалокатга учраган «Титаник» кемаси йўловчиси Рамон Артагавейтия Гомеснинг оиласига жўнатган сўнгги мактуби Монтевидео аукционида 12 минг долларга сотилди, деди «Zorrilla» аукцион уйи вакили.

Уч саҳифадан иборат қўлёзма муаллиф сурати билан бирга ким ошди савдосига қўйилди. Мактуб 1912 йил 12 апрелда Ирландиядан жўнатилган. Ушбу давлат Атлантика океанига кириш арафасидаги сўнгги бекат ҳисобланади.

Ўша пайт дунёда энг йирик ҳисобланган Буюк Британиянинг «Титаник» кемаси 1912 йил 14 апрелда муз тоғига урилиб ҳалокатга учраган. Ўшанда таркиб Саутгемптон – Нью-Йорк йўналиши бўйлаб илк сафарини амалга ошираётган эди. Орадан 2 соат 40 дақиқа ўтиб, лайнер океан тубига чўкиб кетган. Аср фожеасига айланган ушбу ҳалокат 1,5 минг кишининг ёстиғини қуритган.