Бразилия суди давлатнинг собиқ раҳбари Жаир Болсонаруга 2030 йилгача президент сайловида иштирок этишни тақиқлади, деб хабар тарқатди «UOL» янгиликлар портали.

Демак, у 2026 йил бўлиб ўтадиган президент сайловига номзодини қўя олмайди.

Айбланувчи баёнот беришича, у Олий федерал судга мурожаат қилиш имкониятини кўриб чиқмоқда.

Болсонарунинг сайловдан бир неча ой аввал хорижий элчилар билан учрашгани Олий сайлов суди томонидан ҳокимиятни суистеъмол қилиш сифатида баҳоланган. Маҳаллий матбуот ёзишича, учрашувларда Президент сайлов участкаларидаги шароитни танқид қилган, овоз бериш жараёни ҳақида ёлғон хабарлар тарқатган.