Бугун мамлакатимизнинг барча ҳудудларида пилла терими авжида. Бу соҳада бошқа вилоятларга ибрат бўлиб катта ютуқларга эришаётган Сурхон томонларда хом ашёни қайта ишлаш, тайёр маҳсулотларни экспорт қилишга алоҳида эътибор қаратилмоқда. Пиллачилик ва жун саноатини ривожлантириш қўмитаси раиси Баҳром Шарипов ташаббуси билан ташкил этилган ўнлаб пиллани қайта ишлаш корхоналарида минглаб одамлар муқим иш ўрнига эга бўлгани, бундай ўзгаришлар респубилкамизнинг бошқа жойларида ҳам бўй кўрсатаётганини эътироф этсак ишонаверинг. Бир сўз билан айтганда пиллачилик қишлоқ хўжалигининг энг сердаромад соҳаларидан бирига айланмоқда.

Эътибор беринг ипак қуртини пиллага айланиши, хом ашёни  қайта ишлаб  қўшимча қиймат яратиш, унинг экспорти, охир оқибат бир гектар тутзорнинг ўзидан 3 минг АҚШ доллари миқдорида соф фойда олиш имконини яратади, боз устига жуда оз фурсат – бир ойда. Бундан бор- йўғи 6-7 йил илгари бу  ақлга сиғадиган иш эмас эди.  

–Пиллакор бўлиш, шу иш орқали рўзғор тебратиш ҳам даромадли, ҳам шарафли  иш бўлиб бормоқда, – дейди Пискент тумани “Агропилла” МЧЖ ҳосилоти Санобар Жўраева. – Хонадонида ипак қурти боқишга киришган оила бир ой ичидаёқ  8-9 миллион  сўм фойда олмоқда. Ҳеч қандай харажатсиз, фақат ишчи кучи сарфлаб.  Ўтган йил пискентлик ўнлаб оилалар  бир ярим-икки  қути ипак қурти боқиш орқали ана шундай натижага эришди. Кимдир тўй қилди, яна кимдир рўзғорини обод қилди. Муҳими бугун ҳамкорларимиз иштиёқ билан пилла етиштиришга киришган. Пиллачиликнинг кластер тизимига ўтиши соҳа ривожига жуда катта туртки берди. Энди пиллакорлар аввалгидек йиллаб пилла пулини ололмай сарсон бўлиб юрмаяпти, ҳар бир килограмм пилланинг пули насия қилмасдан ўша онда, тарозининг бошида санаб бериляпти. Бир сўз билан айтганда офарин.  

– Хўжалигим  аъзолари билан келишган  ҳолда 16 қути ипак қуртини  парваришлашга киришган эдик. Йил давомида экинни суғориш баҳонасида тутларнинг  оби- ҳаётга қонгани баргнинг мўл-кўл бўлишига имкон яратди. Ҳосилдорлик юқори бўлди. Бугун меҳнатимиз натижасини кўряпмиз, – дейди  тумандаги  Раҳматжонова Сарвиноз номли фермер хўжалиги раҳбари Жамол Хидиров. – Бундан ташқари, пилла етиштирган одамларнинг ҳовлиси ўтинга тўлди. Очиғи, ўтган қиш ўтин тақчиллиги боис овора бўлган, совуқ қотган баъзи кишилар ўтин йиғилгани  зўр бўлди-да, дейишмоқда. Агар бир ғарам  ўтин  қиш чилласида 2 миллион сўмдан ошиб кетишини назарда тутсак  тутнинг  қуриган новдалари ҳам қўшимча фойда-да. 

Санобар Жўраевнинг эътироф этишича, бу йил пискентлик пиллакорлар  2700 қути ипак уруғини жонлантириб ишга киришган эди. Ҳадемай кўзланган мақсад 157  тонна пилла  хом ашёси фабрикага жўнатилади.  Қўмита раиси Баҳром Шариповнинг топшириғига кўра, энг юқори натижага эришган пиллакорларга  ипакчилик фабрикаси томонидан  махсус мукофотлар ҳам топшириш режада бор. Муҳими пилланинг бир мисқоли, бир донаси ҳам исроф қилинмайди.  

– Насиб этса, бу йил худди ўтган йиллардагидек ёзги пилла етиштиришни ҳам йўлга қўямиз. Тўғри иккинчи мавсумда  салмоқ ҳам ҳосилдорлик ҳам унча юқори бўлмайди, аммо дунё бозорида ипакчилик маҳсулотларига бўлган талабнинг юқори эканлиги  ёзда ҳам ипак қурти боқишга ундаяпти. Муҳими тайёрлов ташкилоти иккинчи бор ипак қурти боқадиган кишиларга керакли  маблағ бермоқчи. Шундай экан биз ҳам пиллакорларга энг яқин кўмакчи бўламизда, – дейди 45 йиллик тажрибага эга бўлган  ҳосилот Санобар Жўраева. – Шу тариқа одамлар яна  бир ой фойдали иш билан банд бўлади, тутзорларни суғориш  орқали эса  тут қатор ораларига экилган экинлардан ҳам юқори ҳосил олинади. Мана сизга  соҳада рўй бераётган ислоҳотларнинг  бўй- басти, хосияти.  

Абдунаби Алиқулов, ЎзА