![](https://cdn.uza.uz/2023/05/12/08/35/O450DaARL7hIRObBkyIKkWC96teEfp1m_normal.jpg)
2023 йил 12 май куни Ўзбекистон Халқ демократик партияси Марказий Кенгашининг навбатдан ташқари пленуми бўлиб ўтди. Унда Марказий Кенгаш аъзолари, масъул ходимлари, Ўзбекистон Республикаси Олий Мажлиси Қонунчилик палатасидаги партия фракцияси, халқ депутатлари Кенгашларидаги гуруҳлари аъзолари, минтақавий партия кенгашлари раҳбарлари ҳамда оммавий ахборот воситалари вакиллари иштирок этди.
Пленумда 2023 йил 9 июль куни ўтказилиши белгиланган Ўзбекистон Республикаси Президенти сайловида Ўзбекистон Халқ демократик партиясининг иштироки тўғрисида масала муҳокама этилди.
Пленум аъзолари ҳар қандай сайлов сиёсий партиялар учун имконият ва катта масъулият эканини таъкидлашди. Сайловда Халқ демократик партияси ўзининг такомиллаштирилган дастурини халқимиз олдига олиб чиқиш, фуқароларнинг хоҳиш-истакларини билиш, фаоллари ва хайрихоҳлари сафини кенгайтириш, энг асосийси, сиёсий платформасини амалга ошириш имкониятига эга бўлиши ҳақида фикр-мулоҳазалар илгари сурилди.
[gallery-11851]
Мунозара ва муҳокамалардан сўнг Ўзбекистон Республикаси Сайлов кодекси ҳамда Ўзбекистон Халқ демократик партияси Уставида белгиланган талаблардан келиб чиқиб, 2023 йил 9 июлда бўлиб ўтадиган Ўзбекистон Республикаси Президенти сайловида Ўзбекистон Халқ демократик партиясининг иштирок этиши ҳақида қарор қабул қилинди.
Пленумда Ўзбекистон Республикаси Президенти сайловида партиянинг муносиб иштирокини таъминлаш билан боғлиқ муҳим масалалар кўриб чиқилди. Сайловда Ўзбекистон Халқ демократик партиясидан Ўзбекистон Республикаси Президентлигига бўлажак номзод кўрсатиш, партиянинг қурултойини чақириш ва унинг кун тартиби, партия қурултойига вакиллик меъёри ва уларни сайлаш тартиби тўғрисидаги масалалар муҳокама марказига қўйилди.
Ислоҳотларнинг ижтимоий самарадорлигини ошириш, электорат вакиллари, сайловчиларда сиёсий-ҳуқуқий билим ва фаоллик кучайишида сайловлар долзарб аҳамиятга эга. Партиямизнинг жамиятдаги нуфузи электорат манфаатларини қай даражада ҳимоя қилаётганимиз, жойлардаги муаммоларнинг ечими юзасидан қандай ташаббуслар билан чиқаётганимизга қараб баҳоланади, деди партия етакчиси.
Халқ демократик партияси, энг аввало, ижтимоий тенглик, ижтимоий барқарорлик ва халқ фаровонлиги ғояларига содиқ қолган ҳолда мамлакатимизда янги иш ўринлари яратиш, ижтимоий соҳани янада ривожлантириш, ижтимоий муҳофазага эҳтиёжманд аҳоли қатламлари манфаатларини ҳимоя қилиш, таълим ва соғлиқни сақлаш тизимини янада ислоҳ қилиш сиёсатини изчиллик билан давом эттириш тарафдори сифатида майдонга чиқмоқда. Мамлакат фуқароларининг манфаатларига мос келувчи ушбу сиёсатни амалга оширишга қодир бўлган шахс номзодини Президент сайловида илгари суришни мақсад қилган.
Пленумда Ўзбекистон Халқ демократик партиясидан Ўзбекистон Республикаси Президентлигига бўлажак номзод тўғрисидаги масала муҳокама этилди. Ўзбекистон Республикаси Президентлигига партия электорати, тарафдор ва фаоллари томонидан тавсия этилган Иноятов Улуғбек Илясович номзоди партиянинг Қурултойида кўриб чиқиш учун маъқулланди.
Сайлов кодексига асосан Ўзбекистон Республикаси Президентлигига бўлажак номзод тўғрисидаги маълумотлар бошқа зарурий ҳужжатлар билан бирга Марказий сайлов комиссиясига тақдим этилади.
Халқ демократик партиясидан Ўзбекистон Республикаси Президентлигига номзод ҳақида якуний қарор қабул қилишга фақат партиянинг Қурултойи ваколатли ҳисобланади.
Пленумда Ўзбекистон Халқ демократик партиясининг XIII қурултойини 2023 йилнинг май ойи учинчи ўн кунлигида Тошкент шаҳрида чақириш ҳақида қарор қабул қилиниб, қурултойни ўтказишнинг аниқ санаси, ўтказиш шакли, жойи ва тартибини белгилаш Ўзбекистон Халқ демократик партияси Марказий Кенгаши Ижроия қўмитаси зиммасига юклатилди.
Қурултойга делегатлар сайлаш масаласида партия Қорақалпоғистон республика, вилоятлар ва Тошкент шаҳар кенгашларининг пленумлари ўтказилади.
***
Ўзбекистон Республикаси Президенти лавозимига номзод ИНОЯТОВ УЛУҒБЕК ИЛЯСОВИЧНИНГ ТАРЖИМАИ ҲОЛИ
Иноятов Улуғбек Илясович 1962 йил 6 августда Тошкент шаҳрида хизматчи оиласида туғилган. Миллати – ўзбек. Олий маълумотли,
1985 йили Тошкент политехника институтини, 1998 йили Тошкент молия институтини тамомлаган. Муҳандис-иқтисодчи, педагогика фанлари доктори, профессор. 2006 йилда «Шуҳрат» медали билан тақдирланган.
Меҳнат фаолиятини 1985 йил Тошкент политехника институтида ўқитувчи лавозимидан бошлаган. 1993-1999 йилларда Тошкент архитектура қурилиш институтида декан ўринбосари, декан лавозимларида ишлаган.
1999-2003 йиллар давомида Тошкент молия ва иқтисодиёт коллежи директори лавозимида ишлаган.
2006 йилдан Тошкент молия ва иқтисодиёт коллежи директори, 2011 йилдан Тошкент давлат педагогика университети ректори,
2013 йилдан халқ таълими вазири, 2018 йилдан эса, Наманган давлат университети ректори сифатида фаолият юритган.
У.И.Иноятов 2019 йилдан Ўзбекистон Халқ демократик партияси Марказий Кенгаши раиси ҳамда 2020 йилдан Ўзбекистон Республикаси Олий Мажлиси Қонунчилик палатаси Спикерининг ўринбосари лавозимида ишлаб келмоқда.
У.И.Иноятов ўзининг депутатлик фаолияти даврида давлат ва жамият бошқаруви, ички ва ташқи сиёсат, суд-ҳуқуқ ва аҳолини ижтимоий ҳимоя қилиш йўналишларида таклифлари билан мамлакатимиз тараққиётига муносиб ҳисса қўшмоқда.
У.И.Иноятов 100 дан ортиқ илмий ишларнинг муаллифи ҳисобланади. Бундан ташқари, унинг таклифи асосида таълим сифатини ошириш, ёшларни юқори технологиялар бўйича касбга тайёрлаш соҳасида Германия, Россия каби давлатларнинг илғор тажрибасини мамлакатимизда қўллашга қаратилган чора-тадбирлар амалга оширилмоқда.
У.И.Иноятов оилали, икки нафар фарзанди бор.
ЎзА