Қорақалпоғистон Республикаси Халқ таълими вазирлигига қарашли таълим муассасаларида “Китоб бизни бирлаштиради” фестивали доирасида “Китобхонлик ҳафталиги” ўтказилмоқда.
Ўзбекистон Республикаси Вазирлар Маҳкамасининг 2020 йил 14 декабрдаги “2020-2025 йилларда китобхонлик маданиятини ривожлантириш ва қўллаб-қувватлаш миллий дастурини тасдиқлаш тўғрисида” ги қарорига мувофиқ, ҳар йили апрель ойининг биринчи ҳафтаси “Китобхонлик ҳафталиги” этиб белгиланди.
Ҳафталикнинг биринчи куни китоб тақдимоти, викториналар, ижтимоий тармоқлардаги савол-жавоб ўйинлари, микс тақдимотлари, учрашувлар, театрлаштирилган байрам кечалари, китоб кўргазмалари, видеороликлар, челленж, вебинар, акциялар ташкил этилди.
[gallery-11246]
Умумтаълим мактабларида “Очиқ эшиклар куни” тадбири ўтказилиб, ўқувчиларга кутубхона бўйлаб саёҳат ташкил этилди. Унда кутубхона қоидалари, китоб кўргазмалари билан таништирилиб, Халқаро болалар китоби кунига бағишланган видеоролик намойиш этилди.
– “2 апрель – Халқаро болалар китоби куни муносабати билан “Китоб бизни бирлаштиради” мавзусидаги байрам тадбири ва “Фарзандимга китоб совға қиламан” акцияси барчада катта таассурот қолдирди, – дейди Қорақалпоғистон Республикаси Халқ таълими вазирлигига қарашли республика Болалар кутубхонаси директори Зулфия Сейтниязова. –Жумладан, театрлаштирилган мусиқий дастурда ўқувчилар иштирокида шоу викторина ўйинлари, ёзувчи-шоирлар билан учрашувлар, болалар ёзувчиси, эртакчи Г.Х.Андерсеннинг туғилган кунига бағишланиб “Андерсен ва болалар” мавзусида микс тақдимотлар ўтказилди. Савол-жавоб ўйинларида болалар эртак китоблардан қизиқарли саволларга жавоб беришди ва ғолибларга кутубхонамиз томонидан китоблар совға этилди. Шу куни “Китоб менинг дўстимсан”, “Китоб миллатимизнинг бебаҳо бойлиги”, “Китоб қалб қуёши”, “Менинг севимли китобим” каби мавзулардаги кўргазмалар китобхонларда катта қизиқиш ўйғотди. Фаол иштирокчиларга Ўзбекистон Экологик партияси Қорақалпоғистон Республикаси партия ташкилоти томонидан совғалар топширилди.
Тадбир иштирокчиларига китобхон ўқувчилар томонидан тайёрланган концерт дастури ва саҳна кўринишлари намойиш этилди.
Довуд АБИБУЛЛАЕВ,
Мақсад ҲАБИБУЛЛАЕВ (сурат), ЎзА