Оҳак ишлаб чиқариш цехида ҳеч қандай ҳужжатларсиз табиий газдан ноқонуний фойдаланилган
Жорий йил март ойи давомида “Ўзэнергоинспекция” ва ҳуқуқни муҳофаза қилувчи органлари ҳамкорликда Фарғона вилоятида назорат тадбирлари ўтказди.
Аниқланишича, вилоятда 6 та улгуржи истеъмолчи томонидан табиий газдан ноқонуний фойдаланилган.
Дастлабки ҳисоб-китобларга кўра, газ таъминоти корхонасига етказилган умумий зарар миқдори 18,352 миллиард сўмни ташкил этган. Жумладан, Фарғона шаҳрида жойлашган хусусий корхонага қарашли оҳак ишлаб чиқариш цехида ҳеч қандай ҳужжатларсиз 18,314 миллиард сўмлик табиий газдан ноқонуний фойдаланилган.
Ҳозирда қоидабузарларга нисбатан ҳуқуқни муҳофаза қилувчи органлар томонидан қонуний баҳо берилмоқда, дейилади Энергетика вазирлиги хабарида.
ЎзА