Давлатимиз раҳбарининг 2021 йил 21-22 январь кунлари Бухорога ташрифида аҳоли турмуш фаровонлигини янада яхшилаш, шаҳар ва туманлар инфратузилмасини мустаҳкамлаш, муҳандислик коммуникация тармоқлари фаолиятини янада кенгайтириш, ишсизлик муаммосини қисқартириш, қишлоқ хўжалиги, саноат, тадбиркорлик ва хизмат кўрсатиш, умуман вилоятни ижтимоий-иқтисодий ривожлантириш юзасидан мутасаддиларга аниқ топшириқлар юклатилган. Жумладан, 143 та банддан иборат 214 та устувор вазифалар ижросини таъминлаш белгиланган.

Сўнгги йилларда вилоятда ижтимоий-иқтисодий жабҳаларни эркинлаштириш, инсон қадрини улуғлаш ҳамда одамларнинг фаровон яшаши учун муносиб шароитлар яратишга алоҳида эътибор қаратилмоқда. Жумладан, аҳоли даромадларини ошириш ва ишлаб чиқаришни рағбатлантиришга қаратилган солиқ ислоҳоти, очиқ ва жамоатчилик таклифларини инобатга олган ҳолда давлатнинг иқтисодиётдаги ролини қисқартириш, давлат корхоналарини босқичма-босқич хусусийлаштириш ва ресурсларни тақсимлаш тизимида бозор механизмларини жорий этиш каби қатор ислоҳотлар амалга оширилган.

Биргина 2022 йилда вилоятда ялпи ҳудудий маҳсулот ҳажми 45,8 триллион, саноат маҳсулотлари ишлаб чиқариш ҳажми 27,2 триллион сўмни ташкил этган. Шунингдек, қишлоқ хўжалиги маҳсулотлари ҳажми 103,6 фоизга ва хизматлар ҳажми 115,8 фоизга ошган. Бюджет даромадларида белгиланган 2 триллион 827 миллиард сўмлик прогноз 3 триллион 232 миллиард сўм ёки 114 фоизга ёхуд 360 миллиард сўм ортиғи билан бажарилган. Маҳаллий бюджетга  белгиланган  режа 120 фоизга бажарилган. 
“Ташаббусли бюджет” дастури доирасида 469 мингдан ортиқ таклиф киритилган бўлиб, умумий қиймати 144 миллиард сўм бўлган 280 та таклиф ғолиб деб топилган. 2022 йилда вилоятда барча соҳа ва йўналишларда аҳолининг 405 минг 500 нафарининг бандлигини таъминлаш режалаштирилган бўлиб, амалда 464,7 минг нафар аҳоли бандлиги таъминланган. 

[gallery-10605]

Маҳаллаларда фаолият юритаётган ҳоким ёрдамчилари томонидан 2022 йил давомида 39 минг 345 та жисмоний ва юридик шахсга умумий қиймати 912 миллиард 300 миллион сўм имтиёзли кредит маблағи ажратилган. Бухоро вилоятининг ҳудудий дастурига мувофиқ, 2022 йилда умумий қиймати 853 миллион долларга тенг 732 та лойиҳа ишга туширилди.  14 минг 787 та янги иш ўрни яратилди. Шу билан бирга, 2022 йил якуни билан 304,9 миллион долларлик тўғридан-тўғри хорижий инвестиция ва кредитлар ўзлаштирилиши режаси 317,1 миллион долларга ёки ўтган йилга нисбатан 117 фоизга бажарилган.

Маҳаллийлаштириш дастурига асосан, вилоятда 2022 йилда 130 та лойиҳа доирасида 434,2 миллиард сўмлик импорт ўрнини босувчи маҳсулот ишлаб чиқариш белгиланган бўлиб, ўтган йилнинг январ-декабрь ойларида 130 та лойиҳа доирасида 1,3 триллион сўмлик 250 турдан ортиқ импорт ўрнини босувчи маҳсулот ишлаб чиқарилиб, бу миқдор режага нисбатан 870 миллиард сўмга ёки 3 баробар ортиқ бажарилди. Импорт самарадорлиги кўрсаткичи 115 миллион долларни ташкил этган.  

Давлат раҳбарининг ташрифи натижада Давлат-хусусий шериклик шартлари асосида Вобкент туманидаги автотранспорт воситалари шоҳбекатини қуриш ишлари якунланиб, фойдаланишга топширилди. Бухоро вилоятидаги ишсиз ёшларни иш билан банд қилиш мақсадида вилоятдаги жами 11 минг 208 нафар ёшларга 238,2 миллиард сўм миқдорида кредит ажратилди. Шофиркон тумани “Мингчинор” маҳалла фуқаролар йиғини ҳудудида жойлашган кичик саноат зонасини табиий газ билан таъминлаш мақсадида “Шофиркон-2” газ тақсимлаш станцияси ҳудудида алоҳида қуввати 10 минг м3/соатга тенг саноат тармоғи қурилди. Шунингдек, Ғиждувон туманида тадбиркорлик фаолияти учун қулай шароитлар яратиш ва ташкил қилинаётган саноат зонасидаги ишлаб чиқариш объектларини табиий газ билан барқарор таъминлаш мақсадида “Ғиждувон” газ тақсимлаш станциясида алоҳида қуввати 25 минг м3/соатга тенг саноат тармоғи қурилди.

Умумтаълим мактабларида интернетдан фойдаланишни мониторинг қилиш ҳамда мазкур хизматлар учун давлат бюджети маблағларини мақсадли сарфланишини назорат қилиб бориш мақсадида Халқ таълими вазирлигига “Ўзбектелеком” АКнинг “Биллинг” тизими орқали реал вақт режимида мониторинг қилиш имконияти яратилди. Вилоятдаги мавжуд 544 та маҳалла фуқаролар йиғинларининг барчаси белгиланган тартибда юқори тезликдаги интернет хизматлари билан таъминланди.

Автомобиль йўллари қўмитаси томонидан 4Р-48 “Зарафшон тракти” автомобиль йўлининг 270 км дан М-37 “Самарқанд – Бухоро – Ашхобод –Туркманбоши” автомобиль йўлига уланадиган 3 километр айланма йўлини қуриш бўйича лойиҳа смета ҳужжатлари ишлаб чиқилмоқда. Қоракўл туманидаги лойиҳа зонасига кирмаган “Сайёт”, “Солур”, “Пойкент”, “Қоракўл” ва “Шўробод” маҳалла фуқаролар йиғини ҳудудидаги 17 та аҳоли пунктларида ичимлик сув тизимини ривожлантириш ва “Дўстлик” сув иншоотига улаш бўйича Вазирлар Махкамасининг 2021 йил 25 июндаги 94-сонли раёсат мажлиси баёни расмийлаштирилиб, баёнга асосан зарур маблағлар ажратилди. 

Вилоятда хизмат кўрсатиш соҳасини ривожлантириш ва аҳолини тадбиркорликка жалб этиш мақсадида ҳудудлардаги ҳар бир маҳаллада камида 2 тадан жами 544 та маҳаллада 1088 та хизмат кўрсатиш шохобчалари (контейнерлар) жойлаштирилди. Марказлашган ҳолда ўрнатилган контейнерлар учун 15,5 миллиард сўмлик имтиёзли кредит маблағлари ажратилди.

Бухоро вилоятидаги 25 та авария ҳолатидаги маданий мерос объектларини 2022 йилда реставрация ва консервация қилиш мақсадида республика бюджетидан 57,5 миллиард сўм маблағ ажратилган. Ҳозирда объектларнинг лойиҳа-смета ҳужжатлари ишлаб чиқилмоқда.
“Обод қишлоқ” ҳамда “Обод маҳалла” давлат дастурлари доирасида кенг кўламли ишлар амалга оширилди. Ҳудудларда нафақат экин майдонлари, боғ-токзорлар, ўнлаб қишлоқларимиз аҳолиси истеъмолга яроқли тоза ичимлик сувидан баҳраманд бўлди. Умуман,  вилоятда барча  соҳада олиб борилаётган ислоҳотлар ўз самарасини бермоқда. 

Зариф Комилов,
Тоҳиржон Истатов (сурат), ЎзА