Президентимиз 2022 йил 29 декабрь куни Халқаро конгресс марказида “Таълим сифатини ошириш – Янги Ўзбекистон тараққиётининг яккаю ягона тўғри йўлидир!” мавзусидаги замонавий дарсликлар кўргазмаси билан танишди.

Юртбошимиз таълим кўргазмаси доирасида бир гуруҳ мактаб ўқитувчилари билан учрашди. Учрашувда Бухоро вилояти Когон туманидаги 3-умумтаълим мактаби директори, “Шуҳрат” медали ва “Меҳнат шуҳрати” ордени соҳиби Ҳурматой Турсунова ҳамда Бухоро туманидаги 22-умумтаълим мактаби бошланғич синф ўқитувчиси Ирода Жўраева ҳам қатнашган эди.

Бухоро вилояти ҳокими Ботир Зарипов мазкур икки тажрибали педагог билан учрашди.

– Давлатимиз раҳбарининг “Таълим сифатини ошириш – Янги Ўзбекистон тараққиётининг яккаю ягона тўғри йўлидир!” мавзусидаги замонавий дарсликлар кўргазмаси доирасида ўқитувчилар билан бўлган учрашуви нафақат мен, балки барча ҳамкасбларим учун ниҳоятда ҳаяжонли кечди, – дейди Бухоро вилояти Бухоро туманидаги 22-умумтаълим мактаби бошланғич синф ўқитувчиси Ирода Жўраева. –Айтиш жоизки, бу воқеа бутун мамлакатимиз ўқитувчилари учун тарихий кун бўлди. Бизнинг умумтаълим мактабимиз ҳам вилоятда тажриба-синов таянч мактаби сифатида белгиланган бўлиб, айни пайтда жараёнларга қизғин тайёргарлик кўрилмоқда. Тажриба-синов жараёнларига мактабнинг 7 та бошланғич синфи жалб этилган бўлиб, уларга 7 нафар тренер-ўқитувчилар бириктирилган.

Шунингдек, мулоқотда вилоятда умумтаълим мактабларининг моддий-техник базасини мустаҳкамлаш ва инфратузилмасини яхшилаш, таълим-тарбия сифати ва самарадорлиги, педагог кадрларнинг касбий маҳоратини оширишга қаратилган устувор вазифалар ҳақида алоҳида сўз борди. Шундан келиб чиқиб Ботир Зарипов мутасаддиларга топшириқ ва кўрсатмалар берди.

Зариф Комилов, ЎзА