“ЖЧ-2022”нинг ҳаяжонли уч ҳафтаси ортда қолди. 13-14 декабрь кунлари ярим финал ўйинлари ўтказилса, 17-18 декабрь кунлари Қатарда янги жаҳон чемпиони ва мундиалнинг совриндор жамоалари маълум бўлади.
Сешанба куни Аргентина ва Хорватия, чоршанбада эса Марокаш ва Франция майдонга тушади.
Келинг, чорак финал босқичига яна бир назар ташлайлик.
Англия ва Франция матчи 1:2 ҳисобида якунланади. Ўйин тугаши билан Эммануэль Макрон “Баракалла, футболчилар! Бутун мамлакатимиз сизлар билан, биргаликда ишни охирига еткамиз”, деди ва “Марокашликлар, сизларни тарихий ғалаба билан табриклайман. Ярим финалда кўришгунча”, дея хитоб қилди.
Франция 2018 йил Россияда ўтган мундиалда ғолиб чиққан эди. Бу гал ҳам футболчиларини қўллаб-қувватлаш учун Президент Макроннинг ўзи Даккага кетаётгани хабари тарқалди.
Энди бевосита ўйин ҳақида. Француз Антуан Гризманн иккита голли узатмаси билан миллий жамоа тарихида энг яхши ассистент мақомига эришди. Унинг маҳсулдор тўп етказиб бериш кўрсаткичи 28 та. Бу борада Гризманндан кейинги ўринларни 26 тадан пасга эга икки афсона – Тьерри Анри ва Зинедин Зидан банд этган.
Гарри Кейн 84-дақиқада 11 метрли жарима тўпини дарвозага аниқ йўллай олмади. «Барча масъулиятни зиммамга оламан, кейинги мундиални яна тўрт йил кутамиз, мен жамоадошларим билан фахрланаман», дея баёнот берди у.
Англия 1954, 1970, 1986, 2002 ва 2006 йилларда ҳам чорак финал босқичидан ўтолмай, мухлисларини ранжитган.
Ярим ҳимоячи Жуд Беллинг жаҳон чемпионатлари 1/4 босқичда майдонга тушган энг ёш ўйинчи, деб топилди. Аввал бу мақом “20 ёшли” Уэйн Рунига тегишли эди.
Буюк Британия Бош вазири Риши Сунак мағлубиятни шарҳларкан, шундай деди: Кейн ва жамоа имконияти даражасидаги ҳамма ишни бажарди. Афсуски, бу камлик қилди. Йигитлар, бошингизни баланд кўтаринг!
Франция дарвозабони 35 ёшли Уго Льорис терма жамоа таркибидаги 143-ўйинини ўтказди. У ҳимоячи Лилиан Тюрамни ортда қолдириб, рекордни янгилади. Льорис, шунингдек, Анри ва ҳамкасби Фабьен Бартездан жаҳон чемпионати финал босқичидаги иштирок борасида ўзиб кетди. 2008 йилдан бери Франция дарвозасини қўриқлаётган Уго 142 ўйинда 116 тўп ўтказган.
Марокаш Португалияни 1:0 ҳисобида енгиб, ҳақиқий сенсация қайд этди.
Ҳужумчи Криштиану Роналду 51-дақиқада захирадан майдонга тушди. Жамоа бош мураббийи Фернанду Сантуш “Бундан афсусда эмасман. Роналду зўр ўйинчи, жамоада унинг ўз ўрни бор”, дея алқади.
Криштианунинг аёли Жоржина Родригес Сантушни “дунёнинг энг яхши футболчисини майдонга вақтида туширмай, катта хатога йўл қўйгани учун” танқид қилди.
37 ёшли Роналду ҳозирча беш марта мундиалда қатнашиб, 22 матчда саккиз гол уришга муваффақ бўлган. Португалия таркибида жами 196 марта майдонга тушган моҳир футболчи миллий жамоа таркибида энг кўп ўйин ўтказган Қувайтнинг Бадир Ал-Мутавий рекордини қайтарди.
Марокашликлар дарвозабони Яссин Боно Қатарда беш матчда гол ўтказмади. Бу борада у африкалик голкиперлар орасида жаҳон чемпионатларида биринчиликни эгаллаб турибди.
Португалия билан ўйинида ҳам 31 ёшли Яссин уч марта аниқ йўлланган зарбани қайтаришга муваффақ бўлди. Марокаш дарвозасига ягона тўпни Канада билан кечган учрашувда жамоанинг ўз ўйинчиси Наиф Агир уриб қўйган.
Илгари Африка жамоалари жаҳон чемпионатларида уч марта чорак финалга етиб боришган ва ҳеч бири рақибни енга олмаган. 1990 йил Камерун Англияга қўшимча вақтда ён берган, 2002 йили Сенегал Туркияга ютқазган. 2010 йил Гана Уругвайга 11 метрли зарбалар сериясида 2:4 ҳисобида мағлуб бўлган.
“ЖЧ-2022”ни ёритаёт икки журналист бевақт вафот этди. Қатарлик сураткаш Холид Ал-Мисслам “Al Kass TV” мухбири эди. Унинг ўлими сабаби айтилмаган.
9 декабрь куни Аргентина ва Нидерландия баҳси давом этаётган вақтда Американинг “CBS Sports” телеканали шарҳловчиси Грант Уол футбол майдонидаги матбуот учун ажратилган жойда ҳушини йўқотди ва эртасига касалхонада вафот этди.
Аброр ХОН, ЎзА