Иорданияда давом этаётган қитъа чемпионати тобора қизғин паллага кириб бормоқда.

Бугун, 4 ноябрь кунги баҳсларда 5 нафар боксчимиз қитъа чемпионатидаги жангларини ўтказади. 71 килограммда Ҳавасбек Асадуллаев — Бямба-Ердене Отгонбаатар (Мўғулистон), 48 кг.да Асилбек Жалилов — Санжар Ташкенбай (Қозоғистон), 51 кг.да Ҳасанбой Дўсматов — Панмот Титисан (Таиланд), 57 кг.да Абдумалик Халаков — Жасим Муҳаммед (Ироқ), 60 кг.да Адҳамжон Муҳиддинов — Баскон Паул (Филиппин).

Мазкур учрашувлар бугун кечки пайти ташкил этилади.

Кеча чемпионатнинг учинчи кунида боксчи қизларимиздан Хадичабону Абдуллаева ва эркаклар терма жамоаси аъзоси Одилжон Аслонов илк саралаш баҳсларида иштирок этди. Одилжон илк босқичда жанубий кореялик Парк Жин Хунгани 5:0 ҳисобида мағлуб этган бўлса, 63 кг вазн тоифасида рингга кўтарилган Ҳадичабону Абдуллаева таиландлик Сомнуек Панпатчарага имкониятни бой бериб қўйди.

Шу ўринда айтиш лозим, мамлакатимиз боксчиларининг Амман рингларида олиб бораётган жанглари кўпчиликнинг диққат эътиборида бўлиб турибди.

Жумладан, бокс бўйича британиялик мутахассис Тейлор OХиггинс ўзбекистонлик Руслан Абдуллаевнинг мусобақада ёшлар ўртасида Осиё чемпиони, катталар ўртасида қитъа чемпионатининг бронза медали совриндори қозоғистонлик Санатали Толтаев устидан 5:0 ҳисобидаги ғалабаси Иорданиядаги мусобақанинг энг шов-шувли баҳсларидан бири бўлишини эътироф этди.

Мутахассислар шунингдек, бугун Рио олимпиадаси ғолиби Ҳасанбой Дўсматовнинг рингга кўтарилаётганлигини катта қизиқиш билан кутаётганлигини, унинг ҳар бир жанги нафақат қитъа, балки дунё бокс олами назаридан четда қолмаслигини таъкидлашмоқда.

Эслатиб ўтамиз, қитъа чемпионати баҳслари 13 ноябрга қадар давом этади. 

Т. Рўзиев, ЎзА