Чилонзор тумани ҳокимлиги матбуот хизматининг хабар беришича, Ғафур Ғулом боғи ҳозирда тест режимида фаолият бошлади. Яъни ўрнатилган ускуналар аҳоли хавфсизлиги учун қайта-қайта синовлардан ўтказилмоқда. Тозалаш ва тартибга келтириш ишлари олиб борилмоқда.

Қайд этилишича, боғ “экофрендли” услубида янгиланди. Энг кичик ташриф буюрувчилар учун ўйин майдонларида хорижда ишлаб чиқарилган тўлиқ табиий композицион материаллардан бўлган турли арқонли зиналар, қоялар ва канатлар ўрнатилди.  

Боғга чархпалак қайтарилди. Ушбу аттракцион ёпиқ кабинкалар ва кондиционерлаш тизимига эга замонавий жиҳозланди.  

Шунингдек, боғ ҳудудида жойлашган иккита кўл тўла таъмирланиб, гидротизимлар тўлиқ ўзгартирилди, шунингдек, кўлларнинг атрофида пляж зоналари ва табиат қуршовида дам олиш учун жойлар яратилди. Кўлларнинг бирида қайиқ ва катамаранлар сақлаб қолинмоқда, иккинчи кўл эса ўрдаклар учун ажратилган.  

Хабарда қайд этилишича, туманнинг гўзал ва шинам дам олиш маскани тез кунларда ўз фаолиятини бошлайди. Маълумот ўрнида, 2020 йилда Ғафур Ғулом боғи модернизация қилиш учун 49 йилга Сингапур компаниясига берилган эди.  

 

ЎзА