Президент таълим муассасалари агентлиги тизимидаги “Янги Ўзбекистон” университетида 2022/2023 ўқув йилида кўплаб билимдон талабалар биринчи курсга саралаб олинди.
Мазкур университетда барча талабалар учун ўқиш кредит модул тизимида олиб борилади. Университет анъаналарига биноан ўқув йили бошланишидан бир ҳафта олдин биринчи курсга ўқишга қабул қилинган талабалар учун улар орасидаги дўстона муҳитни яратиш мақсадида “Таништирув ҳафталиги” ўтказилиши анъанага айланган.
Жорий йилги “Таништирув ҳафталиги” ҳам кўтаринки руҳда ўтди. Мазкур ҳафталикнинг илк куни талабалар гуруҳларга тақсимланиб, уларга менторлар бириктирилди ва фаоллар залида университет ҳақида тақдимот қилиниб, топшириқлар берилди. Талабалар билан университет раҳбарияти ва профессорлари ўртасида очиқ мулоқот ўтказилди. Мазкур очиқ мулоқотда талабалар ўзларини қизиқтирган саволларига жавоб олиб, таклиф ва мурожаатларини ҳам айтиб ўтди. Шунингдек, талабаларга университетда мавжуд гуруҳлар ҳақида маълумот берилиб, уларни қизиқишларига қараб мазкур гуруҳларга аъзо қилинди.
[gallery-8981]
“Спорт куни”да эса спорт мусобақалари ташкил этилди. Жумладан эстафета ўйинлари, арқон тортиш, баскетбол каби мусобақа ва спорт ўйинлари ташкил этилди.
“Китоб куни”да талабалар кичик гуруҳларга ажратилиб, улар ўртасида Заковат интеллектуал ўйинлари ташкил этилди. Мазкур ўйинларда 9 та гуруҳ куч синашиб, энг билимдон талабалар гуруҳи эсдалик совғалари билан тақдирланди. Шунингдек, талабаларга турли давлатларнинг маданияти ва урф-одатларини кўрсатиб бериш вазифаси ҳам топширилган бўлиб, улар ўзлари танлаган давлатлар бўйича ўз бадиий чиқишларини ҳам тақдим этди. Энг яхши бадиий чиқиш соҳиблари эсдалик совғалари билан тақдирланди.
“Таништирув ҳафталиги”нинг охирги бешинчи куни Финал деб номланиб, ушбу кун ҳафта давомида энг фаол бўлган гуруҳлар университет маъмурияти томонидан совғалар билан тақдирланди. Ушбу тадбирни очиб бериш учун Президент таълим муассасалари агентлиги раҳбари Ҳилола Умарова сўзга чиқди ва талабаларни ҳафталикни муваффақиятли якунлаганликлари ва профессор ўқитувчиларни яқинлашиб келаётган байрам билан табриклади. Концерт дастури ҳам намойиш этилди.
Н.Усмонова, ЎзА