Бухоро вилояти давлат солиқ бошқармасида Ўзбекистон Республикаси Давлат мустақиллигининг 31 йиллиги муносабати билан тантанали тадбир бўлиб ўтди.

Бошқарманинг шахсий таркиби,  барча шаҳар ва туман давлат солиқ инспекцияларидан таклиф этилган давлат солиқ хизмати ходимлари иштирокида ўтган байрам тадбирида сўз олган вилоят давлат солиқ бошқармаси бошлиғи М.Маматханов йиғилганларни мустақилликнинг ўттиз бир йиллиги билан муборакбод этди. Истиқлол йилларида мамлакатимизда, давлат раҳбари ташаббуси билан хусусан, вилоятда қурилиш, бунёдкорлик, саноат, қишлоқ хўжалиги, қўйингки, жамият ижтимоий ҳаётининг барча жабҳаларида, халқимиз турмуш фаровонлигини юксалтириш борасида кенг кўламли ишлар олиб борилганлигини таъкидлади. Шунингдек, тадбирда сўнгги йилларда Давлат раҳбари ташаббуси билан солиқ тизимида амалга оширилаётган кенг кўламли ислоҳотлар ҳам алоҳида эътироф этилди.

Тантанали тадбирда Ватанимиз мустақиллигининг 31 йиллиги муносабати билан Президентимиз фармонига кўра, бир гуруҳ фидойи юртдошларимиз давлатимизнинг фахрий унвон, орден ва медаллари билан тақдирлангани, жумладан, вилоятдан ҳам 15 нафар фаоллар давлатимизнинг ана шундай юксак мукофотларига сазовор бўлгани фахр билан тилга олинди.
Қувонарлиси, президент фармонига кўра, мукофотланганлар орасида Бухоро вилояти Бухоро шаҳар давлат солиқ инспекцияси давлат солиқ катта инспектори Ислом Сафаров ҳам бор.

Тадбирда Президент фармони билан “Шуҳрат” медали билан мукофотланган Бухоро шаҳар ДСИ давлат солиқ катта инспектори Ислом Сафаровга ташаккурнома билдирилди. 

– Бу йилги истиқлол байрами мен учун унутилмас бўлиб қолади, –дейди Бухоро шаҳар ДСИ давлат солиқ катта инспектори, “Шуҳрат” медали соҳиби Ислом Сафаров. – Давлатимиз раҳбари томонидан камтарона меҳнатим юксак даражадаги давлат мукофотига лойиқ деб топилди. Бу мукофотни барча солиқ тизими ходимларига қаратилаётган эътибор, деб биламан. 

Байрам тадбирида давлат солиқ хизмати органларидаги самарали меҳнати учун бир гуруҳ ходимларга вилоят давлат солиқ бошқармасининг фахрий ёрлиқ ва эсдалик совғалари топширилди.
 

Зариф Комилов, ЎзА