Туркия ташқи ишлар вазири Мавлуд Чавушўғлининг баёнот беришича, Анқара Киевни НАТО бўйича иттифоқчиларининг кўпчилигидан кўра самаралироқ қўллаб-қувватламоқда.

"Биз Украинанинг ҳудудий яхлитлигини қўллаб-қувватламоқдамиз.

Эҳтимол биз Украинани НАТО бўйича иттифоқчи мамлакатларнинг кўпчилигидан ҳам кўра самаралироқ қўллаб-қувватлаётгандирмиз. Шу билан бирга, Россия билан ҳам мулоқот олиб бораяпмиз ва бу ўзининг ижобий натижасини бермоқда. Шу сабабли уларни икки марта музокара олиб боришга кўндирдик ва буғдой бўйича келишувимиз иш берди", - дея келтиради Чавушўғлининг сўзларини Star газетаси.

Унинг таъкидлашича, Туркия Истанбулда Халқаро атом энергияси агентлигини Рссия томони билан учраштирди.
Украина билан Россия ўртасида йўлга қўйилган мулоқот сабабли экспертлар энди Запорожье АЭСини бориб кўради.  

"Экспертлар яна минтақага боради. Бу вақтда биз хавфсизлик кафолатини таъминлашга ҳаракат қиламиз", - дея таъкидлаган  у. 
Запорожье АЭСи Днепр дарёсининг сўл соҳилида Энергодарга яқин жойда қурилган. АЭС энергоблоклар сони ва қуввати бўйича Европадаги энг йирик объект ҳисобланади. Март ойидан буён Запорожье АЭСи Россия ҳарбийлари назоратида турибди.