Миллий матбуот марказида Ўзбекистон Кўзи ожизлар Жамияти мутасаддилари иштирокида ташкил этилган матбуот анжуманида тақдим этилган маълумотларга кўра, Ўзбекистон кўзи ожизлар жамияти кўриш бўйича ногиронлиги бўлган шахсларнинг ихтиёрий аъзолигига асосланган нодавлат нотижорат ташкилот ҳисобланади.

Мутасаддиларнинг сўзларига кўра, ЎзКОЖ фаолияти асосан инсонпарварлик ва раҳмдиллик, шахс қадр-қиммати ҳамда жамият ҳар бир аъзоси фикрига ҳурмат, фикрлар хилма-хиллиги ва кўпчилик фикрининг устуворлиги ҳамда озчиликнинг фикрига ҳурмат билан қараш, кўриш бўйича ногиронлиги бўлган шахсларнинг ёши, жинси, миллати, ирқи, диний эътиқоди ва сиёсий қарашлари ҳамда ногиронлик тоифалари ва белгиларидан қатъи назар, камситилишига йўл қўйилмаслик тамойилларига асосланади.

Қайд этилишича, мамлакатда истиқомат қилувчи кўзи ожиз фуқароларнинг сайлов ҳуқуқларини амалга оширишда кўмаклашиш ҳамда сайлов жараёнларида кўриш бўйича ногиронлиги бўлган шахсларнинг манфаатларини ифодалаш мақсадида белгиланган тартибда сиёсий партиялар билан ҳамкорликни амалга оширади.

Маълумки, Жамиятнинг ташкил топганига яқинда 90 йил тўлди. 1932 йил 15 июнда мамлакатимизда яшовчи бир гуруҳ фаол кўзи ожиз фуқаролар ташаббуси билан жамиятнинг таъсис Қурултойи чақирилиб, унда Ўзбекистон кўзи ожизлар жамияти ташкил этилганлиги эълон қилинган.

[gallery-8242]

Амалга оширилган ишлар натижасида бугунги кунда кўзи ожизлар ўртасидаги саводсизлик батамом тугатилишига эришилган. Жамият томонидан давлат органларининг кўмагида кўзи ожизлар таълимининг барча босқичига жалб этилган. Мамлакатимизнинг турли ҳудудларида тизим тасарруфида ишлаб чиқариш корхоналари ташкил этилиб, уларда бундай фуқароларнинг бандлиги таъминланган. Бошқа тизимларда қулай иш ўринларига ишга жойлашишларига кўмаклашилган. Уларни спорт билан шуғулланишларида, санъатга ошно бўлишларида, ўз қизиқиш ва иқтидорларини намойиш этишларида жамият томонидан ўтказилаётган турли хил оммавий-ташкилий, маданий-маърифий, спорт-соғломлаштириш ҳамда реабилитация тадбирлари муҳим аҳамият касб этмоқда. Ҳар йили 8000 дан зиёд тизимда ўтказилаётган бундай тадбирлар кўзи ожиз шахс камолоти учун муҳим омил бўлмоқда.

Мамлакатимизда кўзи ожизлар ҳаракатида жамият ягона куч ҳисобланади. Уч бўғиндан иборат Ўзбекистон кўзи ожизлар жамияти таркибида айни замонда 1 та Марказий Бошқарув, 14 та ҳудудий бўлим (ҚҚР, Тошкент шаҳри ва вилоят бўлимлари) 189 та маҳаллий бўлинмалар (туман, шаҳар бўлинмалари), 83 та ўқув ишлаб чиқариш корхоналари, сиҳатгоҳ, дам олиш масканлари каби жами 294 та корхона, ташкилот, муассасалар кўзи ожиз фуқаролар учун хизмат кўрсатмоқда.

Бугунги кунда мамлакатимиздаги 77 минг 954 нафар кўзи ожизларнинг 61075 нафари жамият ҳисобига олинган. Жами ишловчи кўзи ожизлар сони 2 минг 855 нафарни, шундан 1101 нафари жамият корхоналарида, 545 нафари жамият тизимида ва 1209 нафари тизимдан ташқари турли ташкилотларда фаолият юритмоқда.

2022 йил 6 ойлик ҳисоботга кўра жами жалб этилган ҳомийлик ёрдамлари, жумладан, ашёвий ёрдамларнинг умумий миқдори 2 421 322 048 сўмни ташкил этган.

Муҳайё Тошқораева, ЎзА