Олий Мажлис Қонунчилик палатасининг навбатдаги мажлиси ўз ишини бошлади. Мажлис кун тартибидан бир қатор масалалар ўрин олган.

Депутатлар дастлаб, “Маъмурий тартиб-таомиллар тўғрисида”ги қонун лойиҳасини  иккинчи ўқишда моддама-модда кўриб чиқди. 

Мазкур қонун лойиҳаси бўйича қуйи палатанинг Коррупцияга қарши курашиш ва суд-ҳуқуқ масалалари қўмитаси раиси ўринбосари Шуҳрат Полвонов маъруза қилди. 

Мазкур қонун лойиҳаси маъмурий тартиб-таомилларнинг ягона ҳуқуқий асосларини белгилаб беради, маъмурий-ҳуқуқий соҳада жисмоний ва юридик шахсларининг ҳуқуқларини ҳимоя қилади, маъмурий органларнинг қонуний ишлашини таъминлайди. Шунингдек, қонун лойиҳаси барча фуқароларни юз фоиз қамраб олади, кундалик турмуш тарзи, фаолияти билан чамбарчас боғлиқ.  

Барча тадбиркорлик субъектлари фаолиятига тааллуқли бўлиб, уларнинг давлат органлари билан муносабатга киришишидаги тартибларни белгилаб беради. Қонун лойиҳаси биринчи ўқишда қабул қилинганидан сўнг, депутатлар берган таклиф ва тавсиялар асосида такомиллаштирилди. Иккинчи ўқишга тайёрлаш давомида бир қатор ўзгаришлар, таҳририй тузатишлар амалга оширилди.  

Ушбу қонун лойиҳасида амалдаги қонундан фарқли равишда бир қатор янги принциплар акс эттирилмоқда. Жумладан, ўзбошимчаликни тақиқлаш принципи, ваколатни суистеъмол қилишни тақиқлаш принципи, ҳуқуқни қўллашни рад этишга йўл қўймаслик принциплари ўз ифодасини топмоқда. 

Мажлисда қайд этилганидек, қонун лойиҳасида назарда тутилаётган янги нормалар маъмурий тартиб-таомилларни амалга оширишда ҳуқуқий барқарорликни таъминлашга, фуқаролар ва тадбиркорларнинг давлат органлари томонидан қабул қилинадиган маъмурий ҳужжатларга ҳурмат ва ишончини кучайтиришга ҳамда мамлакатимизнинг инвестиция муҳитини яхшилашга хизмат қилади. 

Қонун лойиҳаси қизғин муҳокама қилинди. Депутатлар томонидан кўтарилган саволлар, таклифлар юзасидан ташаббускорлар ва соҳа-мутахассисларидан жавоблар олиниб, қонун лойиҳаси иккинчи ва учинчи ўқишда қабул қилинди. 

Қонунчилик палатаси мажлиси давом этмоқда.  
 
 

Муҳтарама Комилова,  
ЎзА