Европанинг 32 мамлакати орасида энг арзон бензин Қозоғистонда экан. Мазкур рўйхатда Россия иккинчи ўринни эгаллаган, дейилади РИА Рейтинг эълон қилган ҳисоботда.
Масалан, Қозоғистонда бензиннинг АИ-95 маркаси 35,7 рубль бўлса, Россияда унинг нархи 51,3 рубль тураркан. Учинчи ўрин Беларусга берилган. Бу мамлакатда бир литр бензиннинг нархи ўртача 61 Россия рублида баҳоланмоқда.
Қитъа мамлакатлари орасида энг қиммат бензин Нидерландияда сотилмоқда, дейилади ҳисоботда. Агар унинг нархи Россия рублида ҳисоблайдиган бўлинса, бир литр бензин 169,1 рублга баҳоланар экан. Ёқилғи нарх-навоси бўйича Нидерландиядан кейинги ўринларни Финляндия, Дания, Норвегия ва Швеция эгаллаган. Бу мамлакатларда бир литр бензин 150 рублдан юқори туради.
Энг арзон дизель ёқилғиси Россияда сотилмоқда. Шунингдек, Қозоғистон, Беларусь ва Украинада ҳам дизель ёқилғиси арзон ҳисобланади.
Дизель ёқилғиси энг қиммат бўлган мамлакат рўйхатининг бошида Швеция бормоқда. Ундан кейинги ўринларни Буюк Британия, Финляндия, Норвегия, Бельгия ва Нидерландия мамлакатлари банд этган.
Сўнгги пайтда деярли барча мамлакатларда бензин нархи кескин ошгани айтилмоқда. Масалан, энг кўп қимматлашиш Литва (+31,7 фоиз), Болгария (+31,5 фоиз) ва Люксембургда (+30,6 фоиз) кузатилган. 32 та мамлакатнинг 14 тасида нарх ўсиш 25 фоиздан пастга тушмаган. Энг кам ўсиш Россия (+8,6 фоиз), Португалия (+14,8 фоиз) ва Беларусда (+16,7 фоиз) қайд этилган.
Бензин нархи қанча бўлишидан қатъий назар, уни сотиб олиш қобилияти ҳам муҳим жиҳат ҳисобланади. Зеро, бензин қиммат бўлиши мумкин, лекин маош ҳам шунга яраша бўлса унинг қимматлиги унчалик сезилмайди ёки у арзон бўлгани билан маош ҳам жуда кам бўлса, барибир қиммат ҳисобланади. Бу борада россияликлар ўзларининг ўртача маошига 920 литр бензин сотиб олиши маълум бўлди.
Европада маошига энг кўп бензин олиш қурбига эга аҳоли Люксембургда истиқомат қилар экан. Бу мамлакат одамлари ўзларининг ўртача ойлигига 2,3 минг литр бензин харид қила олади. Иккинчи ўринда 2,1 минг литр билан Норвегия бормоқда. Ушбу кўрсаткич бўйича кучли бешликка Австрия, Буюк Британия ва Дания киритилди.