Дзюдо бўйича асосий таркиб Токиога, қолганлар Тошкентга қайтди
Хабарингиз бор, дзюдо бўйича Ўзбекистон терма жамоаси аъзолари Япониянинг Киото музофотида жойлашган Майдзуру шаҳрида Токио олимпиадасига сўнгги тайёргарлик машғулотларини олиб боришаётган эди.
Ўзбекистон дзюдо федерацияси матбуот хизмати хабарига кўра, бугун тунда ёзги олимпия ўйинлари иштирокчиларига машғулотларда амалий ёрдам кўрсатган спортчиларимиз Тошкентга йўл олган. Ўз вазифасини шараф билан уддалаган дзюдочиларимизни майдзуруликлар эҳтиром билан кузатиб қўйди.
Олимпия ўйинларида Ватанимиз шарафини ҳимоя қиладиган юртимиз дзюдочилари ва уларнинг мураббийлари эса эртага Токиога йўл олади.
Т.Рўзиев.