Туркиядан хушхабар келди.

Иқтисод фанлари доктори, профессор Одил Олимжоновнинг қайд этишича, Истанбулда улуғ аждодимиз Алихонтўра Соғунийнинг “Бахтлик недур” номли шеърий тўплами чоп этилибди. Тўпламда Ҳазратнинг 50 дан ошиқ шеърлари жамланган. 

Бу шеърлардан 32 таси 2005 йили “Мовароуннаҳр” нашриётида Фурқатхон Ғаффоров муҳаррирлигида тайёрланган “Биздан эмасдурлар Ватанни севмаганлар” китобида эълон қилинган. Ушбу девонга эса Алихонтўра Соғунийнинг шу пайтгача қўлёзма ҳолида қолиб келаётган шеърлари ҳам киритилган.

Мазкур девонда шеърларнинг бешдан бири кирилл ва ўзбекча лотин имлосида ҳамда туркча таржимаси билан тақдим этилган.

Девонни Алихонтўра Соғунийнинг ўғли Қутлуғхонтўра Соғуний (Шокиров) тайёрлаган. Тўпламдаги имонга садоқат ва ватанпарварлик руҳи билан йўғрилган шеърлар халқимизга муборак Рамазон туҳфаси бўлади, деган умиддамиз. 

Эслатма: Ислом оламининг буюк уламоси Алихонтўра Соғуний динимиз, миллатимиз ва ватанимиз тарихида ўчмас из қолдирган саодатманд инсонлардан бири эдилар. 

ЎзА мухбирлари улуғ аждодимизнинг ҳаёт йўллари, кечмиши ва орзулари ҳақида А.Соғунийнинг ўғли Қутлуғхонтўра Соғуний билан суҳбатлашди. Яқин кунларда мазкур видеосуҳбатни эътиборингизга ҳавола этамиз.

ЎзА