Бухоро вилояти ички ишлар бошқармаси ахборот хизмати хабарига кўра, жорий йилнинг 24 апрель куни Жондор тумани ИИБ ЙҲХБ бошлиғи М.Эргашев билдирги орқали вилоят ИИБ бошлиғи номига мурожаат қилади.
Ички ишлар ходими ўз билдиргисида, 1971 йилда туғилган фуқаро Ш.И. таниши фуқаро И.Я. бошқарувида бўлган "DAF" русумли автомобилни жарима майдончасидан олиб чиқиш эвазига пора таклиф қилаётганлигини маълум қилади ва мазкур ҳолат бўйича қонуний чора кўрилишини сўрайди.
Ходимнинг билдиргиси асосида жорий йилнинг 26 апрель куни ҳуқуқни муҳофаза қилувчи орган ходимлари томонидан тезкор тадбир ўтказилади. Фуқаро Ш.И. 500 минг сўм миқдоридаги пулларни пора сифатида М.Эргашевга берган вақтида ашёвий далил билан ушланади.
Мазкур ҳолат юзасидан ИЖҚК департаментининг Вобкент тумани бўлими томонидан фуқаро Ш.И.га нисбатан Ўзбекистон Республикаси Жиноят Кодексининг 211-моддаси 1-қисми билан жиноят иши қўзғатилиб, ҳозирда дастлабки тергов ҳаракатлари олиб борилмоқда.
Зариф Комилов, ЎзА