Бу ҳақда Ўзбекистон Миллий матбуот марказида “Ўзбек заргар саноати” уюшмаси томонидан ўтказилган матбуот анжуманида маълум қилинди.

Жорий йилнинг ёз фаслида мамлакатимизда «Uzbek Jewellery Fair» халқаро заргарлик кўргазмаси ташкил этилиши режалаштирилаётир.

Матбуот анжуманида мамлакатимизда 2020 йилда 300 килограммдан ортиқ заргарлик буюмлари экспорт қилиниб, 500 миллион АҚШ доллари юртимизга кириб келгани қайд этилди.

– Бугунги кунда уюшмамизга 14 дан ортиқ заргарлик фаолияти билан шуғулланаётган масъулияти чекланган жамият аъзо бўлган, – дейди “Ўзбек заргар саноати” уюшмаси бўлим бошлиғи Шоҳрух Тўйчиев.– Бундан ташқари якка тартибдаги тадбиркорларни бирлаштирадиган “Ўзбек заргар” уюшмаси бизнинг уюшмамизга аъзо бўлган. У орқали барча тадбиркорларга ҳуқуқий маслаҳат берамиз. Яна бир ҳақиқатни айтиш жоиз, 25 йил давомида ўзимизда қазиб олинган тиллани ўзимизнинг заргарга сота олмаганмиз.

Уюшманинг асосий вазифаси ноқонуний фаолият олиб бораётган тадбиркорлар билан гаплашиб, уларнинг қонуний ишлашини таъминлашдир. Уюшма ташкил этилганига кўп вақт бўлгани йўқ. Шу сабабли заргарлик тармоғини жадал ривожлантиришда муаммолар кўп.

Шаҳноза Маматуропова, ЎзА