Ўзбекистон Миллий матбуот марказида АТ “Алоқабанк” томонидан ёшларни бизнес ва хусусий тадбиркорликка кенг жалб қилиш борасида амалга оширилган ишларга бағишланган матбуот анжумани ташкил этилди.
Сўнгги йилларда банк тизимини ривожлантириш, айниқса, соҳага замонавий IT-технологияларни кенг жорий этиш, рақамлаштириш жараёнларини жадаллаштиришга қаратилган конструктив чоралар кўрилмоқда. Бу борадаги жараёнлар жорий йилдан пандемия даврида янада тезлашди. Қолаверса, тадбиркорларни қўллаб-қувватлайдиган “лойиҳалар фабрикаси” фаолиятини йўлга қўйишга алоҳида эътибор қаратиляпти.
Матбуот анжуманида жорий йилда банк фаолиятида рўй берган ўзгаришлар, амалга оширилаётган ишлар, тадбиркорлар ва ёшларга ажратилган кредит маблағлари миқдори, яратилган янги рақамли маҳсулот ва хизматлар ҳақида маълумот берилди.
Банк томонидан 2021 йилнинг ўтган даври мобайнида 170 нафарга яқин ёш тадбиркорларга 253 миллиард сўм миқдорда кредит ажратилган. Кредитлар ҳисобига 150 дан ортиқ ёшлар бандлиги таъминланди. Шунингдек, жорий йил давомида хўжалик юритувчи субъектларга ажратилган кредитларнинг 24,5 фоизи ёш тадбиркорлар ҳиссасига тўғри келади.
- Банкимиз томонидан ҳудудларда янги иш ўринларни яратиш, шу жумладан, аёллар ва ёшларни иш билан таъминлаш мақсадида иккита йўналиш танлаб олинган, булар тўқимачилик саноати ва дастурий иловалар орқали ёшлар бандлигига кўмаклашиш, — дейди АТ “Алоқабанк” Бошқаруви раиси ўринбосари Ҳасан Раҳматов. — Бугунги кунда Жиззах вилоятидаги “Жиззах Тоштепа Текстиль” корхонаси томонидан 4 та туманда тикувчилик цехлари ташкил қилинган. Яқин бир йил ичида яна вилоятнинг Зомин, Зафаробод, Зарбдор ва Ғаллаорол туманларида худди шундай тикувчилик цехларини ташкил қилиш режалаштирилган.
Матбуот анжуманининг иккинчи қисмида журналистлар ўзларини қизиқтирган саволларга жавоб олди. Айниқса, банк томонидан ажратилган кредит суммасининг қандай мақсадларга сарфлангани, натижа иштирокчиларни қизиқтирган асосий масала бўлди.
Шаҳноза МАМАТУРОПОВА,
ЎзА мухбири