Пойтахт аэропортида Бишкекдан келган қўшни давлат фуқароси божхонадан “яшил” йўлак орқали ўтиб, жомадонида синтетик гиёҳвандлик воситасини олиб киришга уринган. Текширув жараёнида, 2 та қутидаги 684 дона капсулада 560,75 гр. “альфа-ПВП” синтетик модда мавжудлиги аниқланди.

Мазкур жиноятнинг илдизига етиш мақсадида “Тошкент-Аэро” ихтисослаштирилган божхона комплекси тезкор тузилмалар томонидан Контрабандага қарши курашиш шўъбаси давлат хавфсизлик хизмати ва ички ишлар идоралари вакиллари жалб қилинган ҳолда Тошкент шаҳрида тезкор тадбир ўтказилди. Натижада 560,75 гр. “альфа-ПВП” моддасини қабул қилиши керак бўлган шахс Бектемир туманида қўлга олинди.

Шахснинг хонадони кўздан кечирилганда114 дона капсулада тахминан 80 гр. “альфа-ПВП”, Тарқатишга тайёрланган 37 дона ўрамча, 2 гр. марихуана, 2 дона ўрамда 30 гр. бошқа турдаги синтетик модда, 4 дона электрон тарози, изоленталар ва зиппакетлар моддалар борлиги аниқланди.  

Шунингдек, Сурхондарё вилояти, Сариосиё туманида ҳам тезкор тадбир ўтказилди. Олдиндан кузатиб борилган шахс 14 дона ўрамда жами 14,68 кг. “опий” гиёҳвандлик воситасини 180 минг АҚШ долларига сотаётган пайтда қўлга олинди.

Ҳозирда ҳар иккала ҳолат бўйича божхона органлари томонидан жиноят ишлари қўзғатилган.

Эслатиб ўтамиз, йил бошидан буён 171 та ҳолатда 383 кг. дан ортиқ гиёҳвандлик воситалари божхона назорати орқали аниқланиб, ички ҳудуддаги яширин айланишига чек қўйилди.

Ушбу тезкор тадбирлар гиёҳвандлик воситаларининг чет элдан ноқонуний олиб кирилиши ва маҳаллий бозорлар орқали тарқалишининг олдини олишда муҳим рол ўйнайди.

Ш.Маматуропова,

ЎзА