Зеленский Россия дронлари унинг самолётига икки марта ҳужум қилганини айтди (+видео)
TRT канали хабарига кўра, Украина президенти Володимир Зеленский ўз интервьюсида сўнгги бир неча ҳафта ичида Россия дронлари унинг самолётига икки марта ҳужум қилганини айтган. Зеленскийнинг сўзларига кўра, биринчи воқеа у президентлик самолётида Норвегияга йўл олган пайтда Молдовада содир бўлган.
«Молдовада менинг президентлик самолётим бор эди ва шунинг учун улар Молдовага ҳужум қилишди», — деди у. Норвегия бош вазири ҳам 9 сентябрь куни Россия дрони Молдова ҳаво ҳудудида Зеленскийнинг самолётига хавф туғдирганини айтган.
Шунингдек, Зеленский аввал жамоатчиликка маълум қилинмаган иккинчи воқеа ҳақида ҳам гапирди. Унинг айтишича, бир неча кун ўтиб, президентлик самолёти Украинага қайтиб кетаётган пайтда Молдова ҳаво ҳудудида бир нечта дрон яна таъқиб қилган. Лекин, Украина президенти делегациясининг аъзоларига зарар етмаган.
Украина раҳбари бу воқеаларни уни ва бошқа хорижий давлат раҳбарларини Россия томонидан қилинаётган қўрқитиш стратегиясининг бир қисми деб ҳисоблайди. Аввалроқ, дрон билан боғлиқ биринчи ҳодиса ҳақида хабарлар тарқалган бўлсада, атайлаб ёки тасодифий содир этилгани аниқ эмас эди.
Зеленский, шунингдек, Россия томони якшанба куни Украинага йўл олган хорижий делегация аъзолари кетаётган поездни ҳам атайлаб нишонга олган бўлишлари мумкинлигини билдирди. Йўловчилар орасида Европанинг юқори лавозимли амалдорлари ва Марказий разведка бошқармасининг собиқ директори Дэвид Петреус ҳам бўлган. Россия дрони зарбасидан сўнг улар Польша чегараси яқинида поездни тарк этиб, эвакуация қилинишига тўғри келган.
«Балким, улар у ерда америкаликлар борлигини билмагандир. Ёки билиб туриб қилган бўлишлари ҳам мумкин, чунки мен уларга ишонмайман. Менинг тахминимча, улар билган»,— деди Зеленский.
Маълумотларга кўра, сўнгги ойларда номаълум дронлар Европа давлатларининг ҳаво ҳудудига тобора кўпроқ кириб келмоқда. Айрим дронлар бевосита Россия билан боғлиқ бўлгани айтилмоқда. Литва ҳарбийларининг маълум қилишича, сешанба куни НАТО қирувчи самолётлари биринчи марта Литва ҳаво ҳудудидаги дронни уриб туширган.
<iframe width="650" height="420" src="https://www.youtube.com/embed/082c7Ab3Hlk" title="Zelenskiy Rossiya dronlari uning samolyotiga ikki marta hujum qilganini aytdi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Ктенжа Бекжонов, А.Ахмедов.ЎзА
