Zamonaviy yo‘llar sari katta qadam: 442 mln. dollarlik yirik investitsiya loyihalari amalga oshirilmoqda
O‘zbekistonda avtomobil yo‘llari infratuzilmasini modernizatsiya qilish ishlari 2026-yilda yanada yuqori sur’atlarga chiqdi. Avtomobil yo‘llari qo‘mitasi ma’lumotlariga ko‘ra, joriy yilda sohada jami 15 ta yirik investitsiya loyihasi amalga oshirilmoqda. Ularning 13 tasi xalqaro moliya institutlari ishtirokida, 2 tasi esa davlat-xususiy sheriklik asosida hayotga tatbiq etilmoqda.
Yil davomida mazkur loyihalar doirasida 442 million AQSH dollari miqdoridagi mablag‘ni o‘zlashtirish hamda 365 kilometr avtomobil yo‘lini qurish va rekonstruksiya qilish rejalashtirilgan. Bu ko‘rsatkich 2025-yilga nisbatan 1,5 barobar, 2024-yilga nisbatan esa 1,8 barobar yuqori ekani bilan ahamiyatlidir.
Joriy yilning yanvar–may oylari davomida esa 94,4 million dollar mablag‘ o‘zlashtirildi va belgilangan reja to‘liq bajarildi.
Buxorodan Qoraqalpog‘istongacha: yirik yo‘llar yangilanmoqda
Investitsiya loyihalari mamlakatning turli hududlarini qamrab olgan. Xususan, Buxoro viloyatida A380 “G‘uzor – Buxoro – Nukus – Beyneu” xalqaro ahamiyatga ega avtomobil yo‘lining 78 kilometr qismi rekonstruksiya qilinib, joriy yil 1-sentabrga qadar foydalanishga topshirilishi kutilmoqda.
Surxondaryo viloyatida esa 111 kilometr yo‘lni rekonstruksiya qilish ishlari olib borilmoqda. Bu yerda 51 kilometr qismida zamonaviy sement-beton qoplamasi yotqizildi, yana o‘nlab kilometr masofada yer ishlari amalga oshirildi. Yil yakuniga qadar 60 kilometr yo‘l to‘liq sement-beton qoplama bilan yangilanadi.
Qoraqalpog‘iston Respublikasida ham A380 yo‘lining 25 kilometr qismi rekonstruksiya qilinib, yil oxirigacha harakat uchun ochilishi rejalashtirilgan.
Sement-beton yo‘llar ulushi ortib bormoqda
So‘nggi yillarda O‘zbekistonda uzoq muddat xizmat qiladigan sement-beton qoplamali yo‘llar qurilishiga alohida e’tibor qaratilmoqda. Osiyo taraqqiyot banki ishtirokida amalga oshirilayotgan loyiha doirasida respublika bo‘ylab jami 841 kilometr ichki yo‘lni sement-beton qoplama bilan qurish ko‘zda tutilgan.
Birinchi bosqichda Buxoro viloyatida 52 kilometr va Surxondaryo viloyatida 48 kilometr ichki yo‘l qurib bitkazildi. Keyingi bosqichlarda Sirdaryo, Jizzax va boshqa viloyatlarda ham ushbu ishlar davom ettiriladi. 2026-yilning o‘zida 140 kilometr yo‘lni sement-beton qoplama bilan rekonstruksiya qilish rejalashtirilgan.
Yangi pullik magistrallar qurilishi boshlanadi
Yilning eng muhim infratuzilma loyihalaridan biri — “Toshkent–Samarqand” pullik avtomobil yo‘li qurilishining boshlanishidir. Ushbu zamonaviy magistralning umumiy uzunligi 282 kilometrni tashkil etadi. Yo‘lning asosiy qismi Jizzax va Samarqand viloyatlari hududidan o‘tadi.
Shuningdek, “Toshkent–Andijon” pullik avtomobil yo‘li loyihasi bo‘yicha ham pudratchi tashkilotni tanlash jarayonlari olib borilmoqda. Mazkur loyihalar mamlakatda tezkor va xavfsiz transport qatnovini ta’minlashda muhim ahamiyat kasb etadi.
Yangi qurilishlar geografiyasi kengaymoqda
Xorazm viloyatida Urganch–Xonqa–Hazorasp yo‘nalishidagi 84 kilometrlik yo‘lni rekonstruksiya qilish ishlariga start berildi. Qashqadaryo viloyatida M39 avtomobil yo‘lining 60 kilometr qismi yangilanmoqda va yil oxirigacha 40 kilometr qismi sement-beton qoplamaga o‘tkaziladi.
Shu bilan birga, Sirdaryo, Qoraqalpog‘iston, Xorazm, Qashqadaryo va Surxondaryo viloyatlarida yangi loyihalarni boshlash bo‘yicha tender va tayyorgarlik ishlari olib borilmoqda.
Zamonaviy transport tizimi sari navbatdagi qadam
Mutaxassislarning fikricha, xalqaro moliya institutlari ishtirokida amalga oshirilayotgan ushbu loyihalar nafaqat yo‘llar sifatini yaxshilaydi, balki hududlar o‘rtasidagi transport aloqalarini mustahkamlab, iqtisodiy faollikni oshirishga ham xizmat qiladi.
2026-yilda rejalashtirilgan loyihalarning amalga oshirilishi natijasida yurtimizda zamonaviy, mustahkam va xavfsiz avtomobil yo‘llari tarmog‘ini shakllantirish yo‘lida yana bir muhim qadam tashlanadi.
Muhayyo Toshqorayeva,
O‘zA
