5-9 апрель кунлари пойтахтимизда бўлиб ўтадиган Парламентлараро Иттифоқнинг 150-юбилей ассамблеясига қизғин ҳозирлик кўрилмоқда. Нуфузли анжуманда 200 га яқин мамлакатдан вакиллар, дунё парламентарийлари иштирок этади.

Айни пайтда ассамблея иштирокчилари юртимизга ташриф буюрмоқда.  Мартабали меҳмонларни кутиб олиш ва уларга ҳамроҳлик қилишда Олий Мажлис Қонунчилик палатаси депутатлари ҳам иштирок этмоқда.

Жумладан, Бирлашган Араб Амирлигининг ПИ вице-президенти, Федерал Миллий Кенгашнинг Мудофаа, ички ва ташқи ишлар қўмитаси раиси Али Рашид Ал Нуайми бошчилигидаги делегация Тошкентга ташриф буюрди. Уларга Қонунчилик палатасининг Экологик партия фракцияси раҳбари Абдушукур Ҳамзаев ҳамроҳлик қилмоқда.  

Буюк Британия Вакиллар палатаси аъзоси Фабиан Хамилтонни эса Қонунчилик палатаси депутати Бахтиёр Пўлатов кутиб олди ва унга ҳамроҳлик қилади. Нуфузли анжуманга ташриф буюрган Канада Сенати аъзолари ва жамоат палатаси вакилларини Қонунчилик палатаси депутати Гулнорахон Абдувоҳидова кутиб олиб, меҳмонларга ҳамроҳлик қилмоқда.  

Шунингдек, яна бир қатор давлатлар вакиллари депутатлар иштирокида муносиб кутиб олиниб, парламентаризм дунёсидаги муҳим анжуманга қизғин тайёргарликлар кўрилмоқда.  

Таъкидлаш жоизки, Ўзбекистон мезбонлик қилаётган ушбу халқаро анжуман асносида дунё нигоҳи яна бир бор мамлакатимизга қаратилади ва давлатимиз мазкур сиёсий мулоқотнинг фаол иштирокчиси сифатида намоён бўлади.  

Муҳтарама Комилова, ЎзА