G.V. Plexanov nomidagi Rossiya iqtisodiyot universitetining Toshkentdagi filiali yana bir bor bilimga chanqoq yoshlarni o‘ziga jalb qildi. Bu yerda bo‘lib o‘tgan Ochiq eshiklar kuni va Karera kuni doirasida ushbu ta’lim dargohi katta hayotga tayyorgarlik ko‘rayotgan maktab bitiruvchilari, bo‘lajak abituriyentlar va bitiruvchi kurs talabalari uchun o‘z eshiklarini ochdi.

Tadbirning ilk muhim voqeasi “Karera shu yerdan boshlanadi” shiori ostidagi  Ochiq eshiklar kuni bo‘ldi. Tadbirda  bo‘lajak talabalar  universitet, uning ta’lim dasturlari, o‘qituvchilari va Rossiya iqtisodiyot  universiteti taklif etayotgan imkoniyatlar bilan tanishdi. Abituriyentlar va ularning ota-onalari ma’ruza xonalari va laboratoriyalarni ko‘zdan kechirib, o‘qishga qabul qilish tartibi, o‘quv rejalari va kelgusidagi faoliyat istiqbollari haqida ma’lumotga ega bo‘ldi.  

- Rossiya iqtisodiyot  universiteti XXI asrning chinakam  universiteti bo‘lib, u talabalarning turli sohalarda o‘z salohiyatlarini ro‘yobga chiqarishlari uchun ko‘plab imkoniyatlarni taqdim etadi, - dedi o‘z chiqishida direktor o‘rinbosari, professor Nodira Zokirova. – Ushbu oliy ta’lim muassasasining ustuvor maqsadi yuksak malakali va raqobatbardosh  mutaxassislarni puxta tayyorlashdan iborat. Biz muvaffaqiyatli bitiruvchilari, yuksak malakali o‘qituvchilari, ilg‘or  ilmiy ishlanmalari va biznes-loyihalarning  118 yillik tarixiga ega  Rossiyadagi birinchi iqtisodiyot universiteti - G.V. Plexanov nomidagi Rossiya iqtisodiyot  universitetining Toshkentdagi filialida maktab o‘quvchilarini ko‘rib turganimizdan mamnunmiz. Universitetning Toshkentdagi filiali O‘zbekiston ta’lim bozorida  30 yildan buyon faoliyat yuritib, eng ilg‘or innovatsion texnologiyalar,  ta’lim-tarbiya, ilmiy va ijtimoiy faoliyatni  integratsiya qilish asosida  yoshlarni sifatli oliy ta’lim bilan ta’minlab kelmoqda. Tadbirda universitet mutaxassislari yig‘ilganlarga iqtisodiyot, boshqaruv, xalqaro aloqalar va biznes dasturlari haqida ma’lumot berdi. O‘zbekiston oliy ta’limi sohasida mutlaqo yangi yo‘nalishlar ham bor: «Iqtisodiyot uchun Data Scientist», «Axborot tizimlari va texnologiyalari», «Sun’iy intellekt  tizimlari va texnologiyalari», «Innovatika», «Boshqaruvda raqamli  innovatsiyalar» shular jumlasidan.

2025 yilgi Qabul jarayonlarini tashkil qilish bosqichlari haqidagi taqdimot tadbirning yorqin voqealaridan biri bo‘ldi. Ishtirokchilarga ta’lim muassasasining ijtimoiy tarmoqlardagi sahifalari bilan tanishtiruvchi QR-kodli flayer va bloknotlar tarqatildi.  

Tadbir ishtirokchilariga universitetdagi o‘quv va ilmiy ishlar, xalqaro aloqalar hamda  talabalar uchun keng  imkoniyat eshiklarini ochadigan amaliyot dasturlari haqida batafsil ma’lumotlar berildi.  

Ochiq eshiklar kuni ijodiy ruhda bo‘lib o‘tdi va universitetning  axborot saytida keng yoritildi. Bu yerda ishtirokchilar maxsus elektron shaklda ro‘yxatdan o‘tdi. Shuningdek, ijtimoiy tarmoqlarda 600 nafardan ziyod  bo‘lajak abituriyentlar – Toshkentdagi 30 ta maktab  o‘quvchilarini to‘plagan axborot ko‘magi ham tashkil etildi. Ularga G.V. Plexanov nomidagi Rossiya iqtisodiyot  universitetining Toshkentdagi filiali faoliyati haqida ma’lumot berildi.  

Yuqori bosqich talabalari ishtirokidagi Karera kuni  doirasida tashkil etilgan  mahorat darslari Ochiq eshiklar kunining amaliy qismi bo‘ldi. Tadbirda Rossiya iqtisodiyot  universitetining Toshkentdagi filiali hamkorlari - o‘z jamoasi uchun  iste’dodli bitiruvchilarni  tanlab oladigan yirik kompaniyalar, bank va tashkilotlar vakillari ham ishtirok etdi. G.V. Plexanov nomidagi Rossiya iqtisodiyot  universiteti yoshlarga amaliyot o‘tash va ishga joylashish uchun  ajoyib imkoniyatlarni  taqdim etadi, shu bois  Karera kuni doirasida talabalar  mavzuga doir  tashkil etilgan mahorat darslari orqali  salohiyatli  ish beruvchilar bilan tanishib,  ishga joylashish imkoniyatlari va istiqbollarini muhokama qilish imkoniga ega bo‘ldi.  

Tadbir doirasida talabalar suhbatdan o‘tib,  nomzodlarga qo‘yilgan talablar bilan tanishdi va hatto  amaliyot o‘tash va ishga joylashish bo‘yicha takliflarni ham qo‘lga kiritdi.

Tadbirda iqtisodiyot, biznes, moliya va boshqaruv sohasida  faoliyat yuritayotgan  ko‘plab kompaniyalar  faol ishtirok etib, universitet bitiruvchilari va yosh mutaxassislarga bo‘lgan qiziqishini namoyon etdi.  

Karera kuni  talabalarga  salohiyatli ish beruvchilar  bilan aloqa o‘rnatish imkonini beribgina qolmay, balki muvaffaqiyatli ishga joylashish uchun  o‘quv muassasalari va biznesning hamkorligi muhim ekanini ham ko‘rsatdi.  

G.V. Plexanov nomidagi Rossiya iqtisodiyot  universitetining Toshkentdagi filiali bo‘lib o‘tgan  Ochiq eshiklar kuni va  Karera kuni universitet faoliyati va imkoniyatlari bilan tanishtirish bilan birga,  o‘quv muassasasi, talabalar va ish beruvchilar o‘rtasida  tajriba almashish uchun o‘ziga xos platforma vazifasini o‘taydi, bu esa barcha ishtirokchilar uchun yorqin kelajak garovidir.  

Aziza Alimova, O‘zA.