Yaponiya – O‘zbekiston munosabatlari keyingi yillarda yangi bosqichga ko‘tarilib, barcha yo‘nalishlarda manfaatli hamkorlik aloqalari samarali davom etmoqda. Xususan, bu yapon milliy sporti dzyudo bo‘yicha milliy terma jamoalar, federatsiyalar o‘rtasidagi do‘stona munosabatlar, o‘tkazilayotgan xalqaro o‘quv-mashg‘ulot yig‘inlarida o‘z aksini topib kelmoqda.

O‘zbekiston dzyudo federatsiyasida Yaponiyaning O‘zbekistondagi favqulodda va muxtor elchisi Hatori Takashi bilan o‘tkazilgan uchrashuvda ikki davlat dzyudo federatsiyalarining hamkorligi, o‘zbek dzyudochilarining jahon va Osiyo chempionatlari, Olimpiya o‘yinlarida yuksak yutuqlarga erishayotgani ta’kidlandi.

Muloqot chog‘ida o‘tgan yili Fransiya poytaxti Parijda bo‘lib o‘tgan Olimpiya o‘yinlarida Diyora Keldiyorova -52 kg. vazn toifasida oltin, -100 kg. vaznda Muzaffarbek To‘raboyev, og‘ir vaznda Alisher Yusupovning bronza medallarini qo‘lga kiritgani e’tirof etildi.

Do‘stona o‘tgan uchrashuv davomida Yaponiya tomoni O‘zbekiston dzyudo federatsiyasiga 80 komplekt kimono sovg‘a qildi. Bu, o‘z o‘rnida sport diplomatiyasini rivojlantirish loyihasining bir qismi bo‘lib, u sport orqali xalqaro almashinuv va hamkorlikni rivojlantirishga qaratilgani bildirildi.

T.Ro‘ziyev, O‘zA