“Navoiy” erkin industrial-iqtisodiy zonasida faoliyat ko‘rsatayotgan “TELECOM INNOVATIONS” O‘zbekiston-Singapur-Xitoy qo‘shma korxonasi raqamli televideniye signallarini qabul qilish uskunasi, ADSL modemlar va DSLAM qurilmalari ishlab chiqarishda yetakchi korxonalardan biridir.

“Navoiy” erkin industrial-iqtisodiy zonasida faoliyat ko‘rsatayotgan “TELECOM INNOVATIONS” O‘zbekiston-Singapur-Xitoy qo‘shma korxonasi raqamli televideniye signallarini qabul qilish uskunasi, ADSL modemlar va DSLAM qurilmalari ishlab chiqarishda yetakchi korxonalardan biridir.

Vatanimiz mustaqilligining 25-yilligi bayrami munosabati bilan bu yerda Xitoyning “ZTE” kompaniyasi yangi loyihalari va to‘g‘ridan-to‘g‘ri investitsiyasi evaziga raqamli signallarni qabul qilish qurilmasining IPTV hamda modemlarning Home gateway seriyali yangi turlarini ishlab chiqarish yo‘lga qo‘yildi.

– Qo‘shma korxonamiz 2010-yilda tashkil etilgan, – deydi korxona direktori Firdavs Aliyev. – O‘zbekiston Respublikasi Vazirlar Mahkamasining 2011-yil 28-apreldagi “O‘zbekiston Respublikasi Prezidenti Islom Karimovning Xitoy Xalq Respublikasiga davlat tashrifi vaqtida erishilgan kelishuvlarni amalga oshirish va ikki tomonlama hamkorlikni yanada rivojlantirish bo‘yicha chora-tadbirlar to‘g‘risida”gi qaroriga asosan korxonada zamonaviy tele va aloqa vositalari ishlab chiqarish ko‘lamini kengaytirish, yangi turdagi mahsulotlar tayyorlashni yo‘lga qo‘yish maqsadida Xitoy Xalq Respublikasining “ZTE” kompaniyasi qo‘shma korxona ta’sischilari qatoriga jalb etildi. Natijada ishlab chiqarish hajmi yanada ortdi.

Ayni paytda korxonada mehnat qilayotgan 40 ishchining aksariyati yoshlardir. Mutaxassislar malakasini oshirish, yangi mahsulot turlarini o‘zlashtirish va sifat ko‘rsatkichlarini yanada yaxshilash maqsadida Xitoy Xalq Respublikasining “ZTE” universitetida maxsus o‘quv va malaka oshirish yo‘lga qo‘yilgan.

Korxonada amalga oshirilgan modernizatsiya ishlari samarasida qurilmalar turi 5 dan 15 taga yetkazildi. Natijada 2013-yilda 1 ming 600 qurilma ishlab chiqarilgan bo‘lsa, 2015-yilda bu ko‘rsatkich 16 ming 460 ga yetdi.

ISO 9001:2009 sifat menejmentiga ega korxona 2015-yilda sifat, yetakchilik va mukammallik yo‘nalishida International Quality Crown Award (IQC) mukofoti bilan taqdirlangan.

Nuriddin Rahimov, O‘zA 

Og‘ir atletika bo‘yicha O‘zbekiston xotin-qizlar terma jamoasi a’zolari Iordaniyada o‘tgan II Afro-Osiyo chempionatida 10 oltin, 3 tadan kumush va bronza medallarni qo‘lga kiritdi.

Tajribali atletimiz Marina Sisoyeva vazni 53 kilogrammgacha bo‘lgan sportchilar bahsida shtangani dast ko‘tarishda 82 kilogramm, siltab ko‘tarishda 103, ikkikurashda 185 kilogramm natija qayd etib, uchta oltin medalga sazovor bo‘ldi.

Vazni 58 kilogrammgacha bo‘lgan qizlar bahsida Muattar Nabiyeva shtangani siltab ko‘tarish bahsida shohsupaning eng yuqori pog‘onasiga ko‘tarildi.

69 kilogrammgacha bo‘lgan vazn toifasidagi atletlar musobaqasida g‘oliblik uchun kurash mamlakatimiz sportchilari o‘rtasida kechdi. Manzura Mamasoliyeva shtangani dast ko‘tarishda 91 kilogramm, siltab ko‘tarishda 119, ikkikurashda 210 kilogramm natija bilan uchta oltin medalni qo‘lga kiritgan bo‘lsa, Gulnoza Ahmadova shtangani dast ko‘tarishda 68 kilogramm, siltab ko‘tarishda 85 va ikkikurashda 153 kilogramm natija qayd etib, uchta kumush medal bilan taqdirlandi.

Vazni 75 kilogrammgacha bo‘lgan sportchilar bellashuvida ham birinchi o‘rin terma jamoamiz a’zosi Omadoy Otaqo‘ziyevaga nasib etdi. Tajribali sportchimiz shtangani dast ko‘tarishda 80 kilogramm, siltab ko‘tarishda 102, ikkikurash natijasiga ko‘ra 182 kilogramm natija bilan o‘z vazn toifasida tengsiz ekanini isbotladi.

Ilk bor xalqaro maydondagi musobaqalarda ishtirok etayotgan umidli sportchimiz Dolera Davronova vazni 75 kilogrammdan og‘ir bo‘lgan atletlar bahsida uchta bronza medal bilan taqdirlandi.

Chempionatda O‘zbekiston xotin-qizlar terma jamoasi umumjamoa hisobida birinchi o‘rinni egalladi.