Joriy yilning 17 martidan boshlab Yagona elektron hujjat aylanishi va hisobot tizimi – YeSEDO (edocs.fondbozori.uz) test rejimida ishga tushiriladi.

O‘zbekiston Respublikasi Istiqbolli loyihalar milliy agentligidan  ma’lum qilishlaricha, endilikda investitsiya vositachilari uyushmagan birjadan tashqari qimmatli qog‘ozlar bozorida birjadan tashqari  bitimlarning hisob registirini to‘liq elektron shaklda yuritishi va uni avtomatik tarzda qimmatli qog‘ozlar bozori sohasidagi vakolatli organga yuborishlari mumkin.  

Birjadan tashqari bitimlarga oid ma’lumotlardan tashqari, shuningdek,  shubhali  operatsiyalar, korxonaning malakali  xodimlari,  investitsiya  vositachilarining shaxsiy mablag‘lari to‘g‘risidagi ma’lumotlarni hamda investitsiya aktivlarini  ishonchli  boshqarish va qimmatli qog‘ozlar chiqarilishining  15 va  undan ortiq foizini  tashkil  etadigan bir martalik bitimni ro‘yxatdan o‘tkazish to‘g‘risidagi (birjadan tashqari bozor)  ma’lumotlarni ham  elektron shaklda  taqdim etish mumkin bo‘ladi.  Barcha hisobot turlari investitsiya vositachilarining  rahbarlari tomonidan elektron raqamli imzo (ERI) yordamida imzolangan bo‘lishi kerak.  

O‘zbekiston Respublikasi Istiqbolli loyihalar milliy agentligi Yagona elektron hujjat aylanishi va hisobot  tizimi  to‘liq ishga tushirilganidan so‘ng  taqdim etilgan hisobotning aniqligi, o‘z vaqtida berilishi va  to‘liqligi bo‘yicha barcha javobgarlik investitsiya vositachilariga yuklanadi, deb ogohlantiradi.

Roman BONDARCHUK tayyorladi, O‘zA