IIV akademiyasida mamlakatimizdagi qator huquqni muhofaza qiluvchi organ xodimlari ishtirokida “Xotin-qizlarga nisbatan zo‘ravonlikka qarshi 16 kun” nomli xotin-qizlar huquqlarini ta’minlash va oilaviy zo‘ravonlikning oldini olish masalalari yuzasidan respublika ilmiy-amaliy konferensiya bo‘lib o‘tdi.

Tadbirda soha vakillari tomonidan “Xotin-qizlar huquqlarini ta’minlashda milliy tajriba”, “Xotin-qizlarning ijtimoiy masalalarini hal etish, bandligini ta’minlash”, “Xotin-qizlarni tazyiq va zo‘ravonlikdan himoya qilishning viktimologik choralari”, “Ayollarning mehnat huquqlarini ta’minlash: muammolar va ularni hal qilish yo‘llari” kabi mavzularda ma’ruzalar tinglandi. 

Tadbirda Favqulodda vaziyatlar vazirligi akademiyasi xotin-qizlar jamoatchilik kengashi nomidan so‘zga chiqqan podpolkovnik Maloxat Badalbayeva “O‘zbekistonda xotin-qizlar huquqlarining ta’minlanishi masalalari hamda o‘zbek oilalarida ayollarning tutgan o‘rni” mavzusidagi o‘z ma’ruzasida har qanday xalqning yetuklik darajasini, avvalo, ayollarning ilmiy-madaniy kamoloti belgilab berishini, xalqimiz tili bilan aytganda “Bir qiz bolani o‘qitish – butun millatni o‘qitish bilan barobarligi”ni, “Najot – ta’limda, najot – tarbiyada, najot – bilimda” ekanligini ta’kidladi. U tomonidan namoyish etilgan oilaviy nizolarning farzandlarga ruhan salbiy ta’sir etishi to‘g‘risidagi videorolik esa qatnashchilarda katta taassurot qoldirdi. 

Konferensiya yakunida gender tenglikka erishishda barqaror rivojlanish maqsadlarini amalga oshirish, xotin-qizlarga nisbatan zo‘ravonlikning oldini olishda davlat va fuqarolik institutlarning hamkorligini mustahkamlash, oilalardagi ma’naviy-axloqiy muhitni yaxshilash va shu kabi boshqa dolzarb masalalar yuzasidan taklif va tavsiyalar bildirildi. 

Gulnoza Boboyeva,O‘zA