Urganch shahrida Raqamli texnologiyalar vazirligiga biriktirilgan “Ko‘hna qal’a”, “Feruz”, “Umid”, “Jaloliddin Manguberdi” va “Islomobod” mahalla fuqarolar yig‘inlarida infratuzilmani rivojlantirish, aholining ijtimoiy-iqtisodiy holatini va turmush farovonligini oshirish maqsadida keng qamrovli chora-tadbirlar amalga oshirilmoqda.

Jumladan, mahallalarda optik tolali internet tarmoqlari kengaytirilib, bepul Wi-Fi zonalari tashkil etildi. Aholining raqamli texnologiyalardan foydalanish darajasini oshirishga mo‘ljallangan o‘quv-targ‘ibot ishlari yo‘lga qo‘yildi. 200 nafarga yaqin aholi vakiliga IT, dasturlash, raqamli marketing va boshqa zamonaviy kasblarga o‘qish uchun o‘quv kurslariga yo‘llanmalar berildi.

O‘rganishlar davomida o‘z-o‘zini band qilish imkoniyatiga ega xotin-qizlar, yoshlar aniqlanib, ular tikuv mashinalari, jihozlar va boshqa ishlab chiqarish uskunalari bilan ta’minlandi. IT sohasiga qiziquvchi yoshlar va fuqarolarga zamonaviy kompyuter qurilmalari topshirildi.

N.Rahmonova, O‘zA muxbiri