Xavfsizlik — eng oliy qadriyat
Inson uchun eng qimmat ne’mat — hayot. Hayotni asrash, uni turli xavf-xatarlardan himoya qilish, yurtdoshlarimiz har kuni xotirjam va osoyishta yashashi uchun zarur shart-sharoitlarni yaratish esa davlat siyosatining eng ustuvor yo‘nalishlaridan biridir.
Bugun yurtimizda aholi xavfsizligini ta’minlash, favqulodda vaziyatlarning oldini olish va ularning oqibatlarini bartaraf etish tizimini yanada takomillashtirishga katta e’tibor qaratilmoqda. Prezident Shavkat Mirziyoyev tashabbusi bilan inson hayoti va salomatligini muhofaza qilish, fuqarolarning tinch va farovon hayotini ta’minlash, qutqaruv xizmatlarining moddiy-texnik bazasini mustahkamlash hamda zamonaviy yondashuvlarni joriy etish borasida izchil islohotlar amalga oshirilmoqda.
Bu ezgu maqsadlar Buxoro viloyatining eng chekka Qorovulbozor tumanida ham amaliy natijalarda namoyon bo‘lmoqda.
Vatanimiz mustaqilligining 35 yilligi arafasida Qorovulbozor tumani Favqulodda vaziyatlar bo‘limi uchun kapital ta’mirlangan zamonaviy bino foydalanishga topshirildi.
Mazkur ob’ektni kapital ta’mirlash uchun 2 milliard 252 million so‘m mablag‘ yo‘naltirildi. Qurilish-ta’mirlash ishlari “Mirzo Barakat Stroy” MCHJ tomonidan sifatli amalga oshirildi.
Yangi binodagi sharoitlar oddiy ta’mirdan ko‘ra kengroq ma’noga ega. Zero, favqulodda vaziyatlarda vaqt — eng qimmat resurs. Qutqaruvchining har bir daqiqada tez va to‘g‘ri qaror qabul qilishi, voqea joyiga o‘z vaqtida yetib borishi, zarur choralarni ko‘rishi inson hayotini saqlab qolishi mumkin.
Shu bois yangi binoda xodimlarning kundalik xizmat faoliyatini samarali tashkil etishi, navbatchilik va tezkor harakatlarni muvofiqlashtirishi, favqulodda holatlarga doimiy shay turishi uchun zarur sharoitlar yaratilgan.
Zamonaviy infratuzilma nafaqat xodimlarga qulaylik beradi, balki ularning kasbiy salohiyatini to‘liq namoyon etishi, xizmat vazifalarini sifatli bajarishi va aholiga tezkor yordam ko‘rsatish imkoniyatlarini kengaytiradi.
Bugun favqulodda vaziyatlar xizmati zimmasidagi vazifalar ko‘lami tobora kengayib bormoqda. Yong‘inlarning oldini olish, tabiiy va texnogen xususiyatdagi favqulodda holatlarga tayyor turish, ularning oqibatlarini bartaraf etish, qutqaruv ishlarini tashkil qilish, jabrlanganlarga birinchi navbatda zarur yordam ko‘rsatish — bularning barchasi yuksak mas’uliyat va professional mahoratni talab etadi. Bunday sharoitda qutqaruvchining bilimi va jasorati bilan bir qatorda, uning ixtiyoridagi zamonaviy texnika ham hal qiluvchi ahamiyat kasb etadi.
Shu jihatdan tadbir doirasida Favqulodda vaziyatlar bo‘limi xodimlariga yangi maxsus avtomashinalar topshirilgani ayni muddao bo‘ldi.
Yangi maxsus texnikalar favqulodda vaziyat sodir bo‘lgan hududga qisqa vaqt ichida yetib borish, qutqaruv ishlarini tezkor tashkil etish, xavfli vaziyatni bartaraf qilish va aholiga amaliy yordam ko‘rsatish imkoniyatlarini sezilarli darajada oshiradi.
Boshqacha aytganda, bu texnikalar — temir va mexanizmlardan iborat oddiy vosita emas. Ular ortida inson hayotini asrash, xonadonlarni himoya qilish, bir oilaning xotirjamligini saqlab qolishdek ulkan mas’uliyat mujassam.
Tantanali tadbirda soha xodimlari bilan bir qatorda, yillar davomida aholi xavfsizligini ta’minlashga munosib hissa qo‘shgan faxriylar va tajribali xodimlarning mehnati ham alohida e’tirof etildi.
Tadbirda ishtirok etgan viloyat Favqulodda vaziyatlar boshqarmasi va tuman hokimligi mutasaddilari, soha xodimlari, faxriylar hamda jamoatchilik vakillari yangi binoni ko‘zdan kechirib, bu yerda yaratilgan shart-sharoitlar bilan tanishishdi.
Zarif Komilov, O‘zA muxbiri
