“WikiAntiKorrupsiya” танлови якунлари ёшлар учун самарали бўлди
Маълумки, шу кунга қадар Ёшлар ишлари агентлиги ва қатор ҳамкор ташкилотлар томонидан ёшлар учун кўплаб лойиҳалар тақдим этиб келинмоқда. Уларнинг барчаси ёшлар салоҳиятини ошириш, уларни ҳар томонлама қўллаб-қувватлаш ва рағбатлантиришга хизмат қилмоқда. Ана шундай лойиҳалардан бири – “WikiMarafon” лойиҳаси.
Мамлакатимизда “WikiMarafon”, Ўзбекистон Республикаси Коррупцияга қарши курашиш агентлиги ва БМТ Тараққиёт дастурининг Европа Иттифоқи томонидан молиялаштириладиган "Ўзбекистонда коррупцияга қарши миллий экотизимни мустаҳкамлаш" қўшма лойиҳаси доирасида “WikiAntiKorrupsiya” танлови бўлиб ўтди.
Ўзбекча википедияни бойитиш, ёшлар ўртасида коррупцияга қарши курашишга оид билимларни ошириш, инглиз тилига қизиқиши юқори бўлган ёшларни қўллаб-қувватлашга қаратилган мазкур танлов орқали 30 та ғолиб танлаб олиниб, мутлақо бепул хорижий тилларни билиш даражасини белгиловчи миллий ҳамда умумтаълим фанлари бўйича миллий сертификат имтиҳонида иштирок этиш имкониятига эга бўлди.
Ушбу лойиҳа Европа Иттифоқи томонидан молиялаштирилиб, УНДП ва Ўзбекистон Республикаси Коррупцияга қарши курашиш агентлиги ҳамкорлигида амалга оширилди.
“WikiMarafon” лойиҳаси раҳбари Шоҳжаҳон Собиров танлов имкониятлари хусусида қуйидагиларни маълум қилди:
– Давлатимиз раҳбарининг 2020 йил 20 октябрдаги тегишли фармони билан тасдиқланган 2020-2030 йилларда ўзбек тилини ривожлантириш ва тил сиёсатини такомиллаштириш концепциясига мувофиқ “WikiMarafon” (“WikiStipendiya”) лойиҳаси йўлга қўйилди.
Мазкур лойиҳа давлат тилининг ахборот-коммуникация технологиялари, хусусан, интернет жаҳон ахборот тармоғида муносиб ўрин эгаллашини таъминлаш, ёшларнинг бўш вақтини мазмунли ташкил этиш, ўзбек тилидаги сифатли контентни кўпайтириш ҳамда иқтидорли ёшларни рағбатлантиришга қаратилган.
Лойиҳа Ёшлар ишлари агентлиги ҳамда Ёш ижодкорлар кенгаши ННТ ҳамкорлигида ташкил этилган бўлиб, унинг асосий мақсади ўзбекча Википедияда мақолалар сонини кўпайтириш ва уларнинг сифатини оширишдан иборат. "WikiStipendiya” номи остида 2022 йил 20 май куни бошланган лойиҳа шу пайтга қадар 3 мавсумни ўз ичига олди.
"WikiStipendiya”лойиҳаси натижасида ўзбекча Википедиянинг жаҳон рейтингидаги ўрни сезиларли даражада яхшиланиб, 62-ўриндан 40-поғонага кўтарилди. Натижада ўзбекча Википедия туркий тиллар орасида 3-ўринни эгаллаб, Марказий Осиё минтақасида етакчи позицияни қўлга киритди. Лойиҳа доирасида 70 нафардан ортиқ ёшлар махсус стипендиялар билан тақдирланди.
Август ойидан буён қисқа вақт ичида ўзбекча Википедияда 42 мингдан ортиқ янги мақола яратилди. Бу орқали ўзбекча Википедия жаҳон рейтингида 40 ўриндан 38 ўринга кўтарилди. Лойиҳа доирасида “WikiIELTS”, “WikiKITOB” ва “WikiAntiKorrupsiya” каби қатор остлойиҳалар муваффақиятли амалга оширилиб, 100 нафардан ортиқ иштирокчилар тақдирланди.
Хусусан, Европа Иттифоқи, Коррупцияга қарши курашиш ҳамда Ёшлар ишлари агентлиги ҳамкорлигида ташкил этилган “WikiAntiKorrupsiya” танлови 2 мингга яқин иштирокчини қамраб олди. Танлов якунида 30 нафар иштирокчи Миллий сертификат ёки CEFR имтиҳонларида қатнашиш учун молиявий қўллаб-қувватланди.
Биз бу лойиҳалар орқали ўзбек тилининг интернет майдонидаги нуфузини оширишга катта ҳисса қўшаётган барча билимли ёшларимиз билан фахрланамиз.
Гулноза Бобоева,
ЎзА
