Umarali Rahmonaliyev — Chempionlar ligasida o‘ynagan 7-o‘zbekistonlik futbolchi
UEFA ma’lumotlariga ko‘ra, o‘zbekistonlik futbolchi joriy mavsum turnirda 7 ta uchrashuvda 588 daqiqa harakat qilib, bitta golli uzatmani amalga oshirgan. Uning paslar aniqligi 83 foizni tashkil qilmoqda.
O‘zbekiston milliy terma jamoasi yarim himoyachisi Umarali Rahmonaliyev faoliyatida yana bir muhim sahifa ochildi. Ozarbayjonning “Sabah” klubi futbolchisi UEFA Chempionlar ligasida maydonga tushgan 7-o‘zbekistonlik futbolchiga aylandi.
Rahmonaliyev 2026/27-yilgi Chempionlar ligasi saralashini “Sabah” bilan boshladi va jamoasining final bosqichigacha yetib kelishida muhim rol o‘ynadi. UEFA ma’lumotlariga ko‘ra, o‘zbekistonlik futbolchi joriy mavsum turnirda 7 ta uchrashuvda 588 daqiqa harakat qilib, bitta golli uzatmani amalga oshirgan. Uning paslar aniqligi 83 foizni tashkil qilmoqda.
Umaraligacha O‘zbekiston nomidan Chempionlar ligasida olti futbolchi maydonga tushgan.
Maksim Shatskix bu borada nafaqat O‘zbekiston, balki Osiyo futboli tarixidagi eng yorqin vakillardan biri hisoblanadi. Kiyevning “Dinamo” klubi bilan u Chempionlar ligasida 45 ta uchrashuv o‘tkazib, 11 ta gol urgan. Shatskix uzoq vaqt davomida turnirdagi eng sermahsul osiyolik futbolchilardan biri bo‘lib keldi.
Vladimir Maminov Moskvaning “Lokomotiv” klubi bilan Chempionlar ligasida 26 marta maydonga tushgan va 2 ta gol urgan. U 2000-yillar boshida “Lokomotiv” bilan Yevropaning eng kuchli klublariga qarshi muntazam o‘ynagan.
Oleg Pashinin ham “Lokomotiv” safida turnirda qatnashgan. O‘zbekiston terma jamoasining sobiq himoyachisi Chempionlar ligasida 17 ta uchrashuv o‘tkazgan.
Jafar Irismetov esa Moskvaning “Spartak” klubi bilan Chempionlar ligasida 4 ta o‘yinda ishtirok etgan. Hujumchi turnirda gol urishga muvaffaq bo‘lmagan.
Jasurbek Yaxshiboyevning Chempionlar ligasidagi faoliyati qisqa, ammo juda esda qolarli bo‘ldi. U Moldovaning “Sherif” klubi bilan turnirda 3 ta uchrashuv o‘tkazib, bitta gol urdi. Eng muhimi, bu gol 2021-yil 28-sentabr kuni “Santyago Bernabeu”da “Real Madrid” darvozasiga kiritildi. Yaxshiboyev hisobni ochgan, “Sherif” esa yakunda Madrid gigantini 2:1 hisobida mag‘lub etib, Chempionlar ligasi tarixidagi eng katta sensatsiyalardan birini yaratgan edi.
Abduqodir Husanov esa yangi avlod vakili sifatida bu ro‘yxatga qo‘shildi. U dastlab Fransiyaning “Lans”, keyinchalik “Manchester Siti” safida Chempionlar ligasida maydonga tushdi. 2023-yil noyabrida “Lans” bilan turnirdagi debyutini o‘tkazgan Husanov o‘sha paytda Chempionlar ligasida o‘ynagan eng yosh o‘zbekistonlik futbolchiga aylangandi. 2025/26-yilgi mavsumning o‘zida u “Manchester Siti” safida 6 ta uchrashuvda 514 daqiqa harakat qildi.
Endi ushbu tarixiy ro‘yxatga Umarali Rahmonaliyev ham qo‘shildi. Qolaversa, uning ishtiroki bir-ikki uchrashuv bilan cheklanib qolmadi. “Sabah” bilan saralashning bir necha bosqichidan o‘tgan yarim himoyachi 7 ta uchrashuvdayoq katta Yevropa tajribasini to‘pladi.
Shu tariqa, O‘zbekiston futbolining Chempionlar ligasidagi vakillari ro‘yxati hozircha quyidagicha: Maksim Shatskix, Vladimir Maminov, Oleg Pashinin, Jafar Irismetov, Jasurbek Yaxshiboyev, Abduqodir Husanov va Umarali Rahmonaliyev.
Shatskixning 11 goli, Yaxshiboyevning “Real Madrid” darvozasiga tarixiy goli, Husanovning “Lans” va “Manchester Siti”dagi ishtirokidan so‘ng endi Chempionlar ligasidagi o‘zbek futbolchilari tarixini Umarali Rahmonaliyev davom ettirmoqda.
