Mo‘g‘uliston poytaxti Ulan-Bator shahrida dzyudo bo‘yicha "Katta dubulg‘a" turkumiga kiruvchi nufuzli turnirda hamyurtimiz Umar Bozorov final bellashuvida ishtirok etdi.

Umar polvon vazni -90 kg. bo‘lgan dzyudochilar o‘rtasida finalga qadar o‘tgan bellashuvlarning barchasida muvaffaqiyatli ishtirok etib, so‘nggi hal qiluvchi bahsda yaponiyalik Riku Okadaga imkoniyatni boy berib qo‘ydi va kumush medal hamda 700 reyting ochkosi bilan taqdirlandi.    

Darvoqe, Umar Bozorov joriy yilning mart oyida Gruziyaning Tbilisi shahrida o‘tgan "Katta dubulg‘a" turnirida oltin medalga ega chiqqan edi.  

Eslatib o‘tamiz, mazkur musobaqada bundan avval hamyurtimiz Abdurahim Nutfulloyev vazni 66 kilogrammgacha bo‘lgan dzyudochilar o‘rtasida to‘qnash kelgan barcha raqiblarni mag‘lub etgan holda oltin medalga sazovor bo‘ldi.  

Javohir Toshxo‘jayev, O‘zA