Теннисчиларимиз халқаро турнир ярим финалида
Фарғонада Халқаро теннис федерацияси ва мамлакатимиз теннис федерацияси томонидан ташкил этилаётган J60 таснифидаги турнирда ярим финалга йўл олган ракетка усталари номи аниқ бўлди.
Турнирнинг жуфтлик баҳсларида Элнура Болтабоева ва Фотима Маҳмудова тандеми чорак финалда қозоғистонлик Линара Булешева ҳамда нейтрал теннисчи Мария Маслиаковага қарши кортга чиқиб, 6:3, 1:6, 10:8 ҳисобида зафар қучди ва ярим финал йўлланмасини қўлга киритди. Энди Элнура ҳамда Фотима финал остонасида қозоғистонлик Кристина Крученко ва Еркежан Жанатаева билан рақобатлашади.
Ўғил болалар ўртасидаги ярим финалда ўзбек дербиси бўлиб ўтади. Унда Данила Квасов ва Аҳмаджон Тошмуҳаммедов дуэти Акмал Абдуллаев ва Суҳроб Саидов жуфтлиги билан куч синашади.
Эслатиб ўтамиз, Данила Квасов яккалик баҳсларининг ярим финалида ҳам иштирок этади. Данила ушбу босқичда нейтрал теннисчи Александер Куницинга қарши ўйин ўтказади.
Жавоҳир Тошхўжаев,
ЎзА
