Бугун Наманган вилоятидаги умумтаълим мактабларида “Ватан учун, миллат учун, халқ учун” шиори остида тадбирлар ўтказилиб, янги ўқув йили бошланди. Айниқса, Наманган шаҳридаги 3-сонли умумтаълим мактабида янграган биринчи қўнғироқ садолари устоз муаллимлар, ўқувчилар ва уларнинг ота-оналарини бирдек мамнун этди.

Тантанали маросимда Наманган вилоят ҳокими, Олий Мажлис Сенати аъзоси Шавкат Абдураззоқов Президентимизнинг Мамлакатимиз мактаблари ўқувчилари ва устоз-мураббийларига йўллаган табригини ўқиб эшиттирди. 

Сўнгги йилларда мамлакатимиз таълим тизимини тубдан ислоҳ этиш борасида олиб борилаётган ижобий ўзгаришлар ва уларнинг самараси эртамиз эгаларининг эришаётган улкан натижаларида ўз ифодасини топаётганлиги эътироф этилди. 

Таъкидлаш жоиз, 2 минг 135 нафар ўқувчи таҳсил олаётган мактабнинг собиқ битирувчиси, “Aisha home textile” компанияси таъсисчиси Жобирхон Камолиддинов ҳомийлигида 944 ўринли ўқув биноси мукаммал таъмирланиб, 100 ўринли фаоллар ва спорт зали реконструкция қилинди ҳамда 150 ўринли ошхона қуриб берилди. 

Ўқувчи қуввати 1 минг 264 ўрин бўлиб, таъмирлаш ишларидан сўнг вилоят нотариал архиви биноси негизида қўшимча 320 ўрин ҳозирланди ҳамда 1 минг 584 ўринга келтирилди. Ушбу мақсадларга 15 миллиард сўм маблағ йўналтирилди. 

Жорий йилнинг 20 август – тадбиркорлар кунида Президентимизга Наманган тадбиркорлари амалга ошираётган ишлар, шу жумладан, Жобирхон Камолиддиновнинг ташаббуси ҳақида маълумот берилган ҳамда давлатимиз раҳбари бу каби хайрли ишларни қўллаб-қувватланишини таъкидлаганди. 

Тадбирда, тадбиркорга мамлакатимиз раҳбарининг миннатдорлиги етказилиб, бунёдкорлик ишлари алоҳида эътироф этилди. Тантанали маросимда иштирокчилар замонавий илм масканида яратилган шарт-шароитлар билан яқиндан танишди. 

Мактабга Наманган шаҳридаги Алпомиш, Заркент ва Сардоба маҳалларидан 2 минг 125 ўқувчи боради. Улардан 220 нафари илк бор мактаб остонасига қадам қўйди ва уларга Президент совғалари тақдим қилинди. Эътиборлиси, жажжилар учун тадбиркор ташаббуси билан бепул тушликлар ташкил этилади. 

Наманган вилояти мактабгача ва мактаб таълими бошқармасининг маълум қилишича, янги ўқув йилида вилоятдаги мавжуд 720 та умумтаълим мактабига 63 067 нафар биринчи синф ўқувчиси қадам қўйди. Барча синфларда “Ватан учун, миллат учун, халқ учун!” шиори остида “Келажак соати” дарслари ўтказилди.

[gallery-25133] 

Маълумот ўрнида, 2025 йилда вилоятдаги 50 та таълим муассасаси инвестиция дастурига киритилиб, шундан битта янги ихтисослашган мактаб, иккита янги боғча қуриш, 33 та мактаб ва 14 та боғчани реконструкция қилиш учун жами 359 миллиард сўм маблағ ажратилган. 

Оқилхон Дадабоев, Ҳотам Мамадалиев (сурат), ЎзА.