Ёш авлод истеъдодини юзага чиқариш, уларнинг санъатга бўлган қизиқишини қўллаб-қувватлаш мақсадида ташкил этилган “Иқтидор” мактаб ансамбли” республика танловининг Сурхондарё вилоят босқичи бўлиб ўтди.

Санъатга ихлоси баланд, кўзларида умид ва катта ишонч билан саҳнага интилган ёшлар қўлига мусиқий асбобларини олиб, бор маҳоратини ишга солди. Танлов қисқа вақт ичида нафақат иқтидорли ёшларни бирлаштирди, балки уларнинг қалбида санъатга, мусиқага, саҳнага бўлган чексиз муҳаббатни янада жонлантирди.

[gallery-22861]

Танлов 6-10-синф ўқувчиларидан иборат жамоалар ўртасида ўтказилди. Умумтаълим мактабларидан сараланган ансамбллар беллашувида ҳар бир жамоа ўзининг ижодий чиқиши, мусиқий кўриниши, жонли ижроси ва саҳнадаги ўзига хос ҳаракатларини намойиш этди. Вилоятнинг шаҳар ва туманларидан ташриф буюрган 15 та жамоанинг чиқишлари якунлангач, якуний натижаларга фурсат етди.

Денов туманидаги 27-мактаб жамоаси биринчи ўринни эгаллаб, танловнинг республика босқичига йўлланма олди. Шўрчи туманидаги 1-мактаб жамоаси иккинчи, Термиз шаҳридаги 2-мактаб ёшлари учинчи ўринга сазовор бўлди. 

<iframe width="650" height="420" src="https://www.youtube.com/embed/vdc7KHVKb6o" title="Surxondaryodagi maktab ansambllari oʻzaro bellashdi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Жонибек ҚЎЗИМУРОДОВ (сурат ва видео), ЎзА