Superliga: "Nasaf" peshqadam "Neftchi"ga 6 ta gol urdi, "Navbahor"ning g‘alabali seriyasi to‘xtadi
Eng ko'p gol Qarshidagi o'yinda kiritildi.
O‘zbekiston Superligasining 20-turida navbatdagi uchta uchrashuv yakunlandi. Turning markaziy bahsida "Nasaf" peshqadam "Neftchi" darvozasiga oltita gol urgan bo‘lsa, "Surxon" Toshkentda "Bunyodkor"ni mag‘lub etdi. "Navbahor" va "Lokomotiv" o‘rtasidagi uchrashuvda esa g‘olib aniqlanmadi.
"Nasaf" peshqadamni yirik hisobda mag‘lub etdi
Qarshidagi "Markaziy" stadionida "Nasaf" va "Neftchi" o‘zaro to‘qnash keldi. Mezbonlar uchrashuvni yuqori sur’atda boshlab, dastlabki daqiqalardanoq raqib darvozasiga yo‘l topdi.
6-daqiqada Umarbek Eshmurodov hisobni ochdi. Oradan atigi ikki daqiqa o‘tib, Sharof Muhitdinovning uzatmasidan foydalangan Bobir Abdixoliqov qarshiliklarning ustunligini oshirdi.
22-daqiqaga kelib Muhitdinov assistdan keyin o‘zi ham gol muallifiga aylandi. Tanaffusga besh daqiqa qolganida Adenis Shala "Neftchi" darvozasiga to‘rtinchi to‘pni kiritdi. Natijada "Nasaf" birinchi bo‘limning o‘zidayoq 4:0 hisobida oldinga chiqib oldi.
Ikkinchi bo‘lim boshlanishi bilan Abdixoliqov yana bir bor raqib darvozasini ishg‘ol qilib, dubl qayd etdi.
58-daqiqada zaxiradan maydonga tushgan Alisher Odilov farg‘onaliklarning dastlabki javob golini urdi. Ammo 80-daqiqada Alibek Davronov "Nasaf"ning oltinchi goliga mualliflik qildi.
Uchrashuv yakunlanishiga bir daqiqa qolganida Stipe Perisa Alisher Odilovning uzatmasidan foydalanib, hisobni 6:2 ko‘rinishiga keltirdi.
Shu tariqa, Ro‘ziqul Berdiyev shogirdlari Superliga peshqadami "Neftchi" ustidan 6:2 hisobida yirik g‘alabaga erishdi.
"Surxon" Toshkentdan uch ochko bilan qaytdi
Toshkentdagi "Jar" stadionida "Bunyodkor" "Surxon"ni qabul qildi. Uchrashuv taqdirini bitta gol hal qildi.
Bahsning 67-daqiqasida "Bunyodkor" himoyachisi Islom Anvarov maydondan chetlatildi. Natijada mezbonlar uchrashuvning qolgan qismini bir kishi kam bo‘lib davom ettirdi.
Oradan o‘n daqiqa o‘tib "Surxon" son jihatdan ustunlikdan foydalandi. Komronbek Yusupovning uzatmasidan so‘ng Tornike Dzebniauri to‘pni darvozaga yo‘llab, mehmonlarni oldinga olib chiqdi.
"Bunyodkor" qolgan daqiqalarda hisobni tenglashtira olmadi. Natijada "Surxon" 1:0 hisobidagi g‘alaba bilan Toshkentdan uch ochko olib ketdi.
"Lokomotiv" "Navbahor"ning g‘alabali seriyasiga nuqta qo‘ydi
Namangan markaziy stadionida "Navbahor" va "Lokomotiv" o‘rtasidagi bahs 1:1 hisobida yakunlandi.
Uchrashuvning 40-daqiqasida Muhammadali Usmonovning uzatmasidan keyin Husayn Norchayev hisobni ochdi. "Navbahor" tanaffusga bir to‘plik ustunlik bilan chiqdi.
Ikkinchi bo‘limda "Lokomotiv" vaziyatni o‘nglashga muvaffaq bo‘ldi. 61-daqiqada zaxiradan maydonga tushgan Jasur Yaxshiboyev 72-daqiqada Bilol Tupliyevning uzatmasini golga aylantirib, hisobni tenglashtirdi.
Qolgan daqiqalarda darvozalar boshqa ishg‘ol qilinmadi va jamoalar bittadan ochko bilan kifoyalandi.
Shu tariqa, ushbu uchrashuvga qadar Superligada ketma-ket oltita o‘yinda g‘alaba qozongan "Navbahor"ning muvaffaqiyatli seriyasi yakunlandi. "Lokomotiv" esa Namangan safaridan bir ochko bilan qaytdi.
