Urganch shahridagi "Yoshlik" sport majmuasida Xorazm viloyatidagi davlat organlari va tashkilotlari hududiy boshqarmalari xodimlari o‘rtasida "Spartakiada –2024" sport musobaqalari o‘tkazildi.

Musobaqalar sportning stol tennisi, shaxmat, shashka, estafetali yugurish va “Quvnoq startlar” turlari bo‘yicha o‘tkazildi.

Mazkur musobaqalarda viloyatdagi 9 ta tashkilotning xodimlari ishtirok etdi.

[gallery-20891]

Musobaqa natijalariga ko‘ra, stol tennisida ayollar o‘rtasida Xorazm viloyat qishloq xo‘jaligi boshqarmasi xodimasi Nasiba Ahmedova 1-o‘rinni qo‘lga kiritgan bo‘lsa, erkaklar o‘rtasida viloyat soliq boshqarmasi hodimi Odamboy Bekjanovga teng keladigani topilmadi. 

“Estafetali yugurish” musobaqqasida Davlat aktivlarini boshqarish agentligi viloyat boshqarmasi jamoasi g‘olib bo‘ldi. 

“Quvnoq startlar” musobaqalarida viloyat qishloq xo‘jaligi boshqarmasi jamoasiga omad kulib boqqan bo‘lsa, shaxmat bahslarida viloyat iqtisodiyot va moliya boshqarmasi xodimasi Fazilat Qalandarova barcha raqiblarini mag‘lubiyatga uchratdi. 

G‘oliblarga tashkilotchilarining diplom va edalik sovg‘alari topshirildi. 

Ahmadjon Shokirov, Behzod Saidov (surat), O‘zA muxbirlari